C.Ronaldo: E dua Manchesterin

Titulli: C.Ronaldo: E dua Manchesterin 4/2/2008, 13:12

Cristiano Ronaldo: E dua Manchester United

Ylli i Mançester Junajtedit, portugezi Kristiano Ronaldo, ka thënë se nuk dëshiron të kalojë te Reali i Madridit dhe në lidhje me këtë është shprehur shkurt: “Nuk dua të jem galaktik”.
Të trimëruar me deklaratën e menaxherit të Ronaldos, Zhorzh Mendes, sipas së cilit portugezi deri në fund të stinorit nuk do të mendojë për rinovimin e kontratës me Mançesterin, zyrtarët e Real Madridit kanë përgatitur ofertën prej rreth 90 milionë eurosh.
Sipas gazetës spanjolle "AS", kontrata aktuale e Ronaldos, e cila skadon në vitin 2010, nuk ka ndonjë klauzolë rreth shkëputjes, kështu që pronari i klubit anglez, amerikani Malkom Glejzer, do të përpiqet të përfitojë sa më shumë nga ky rast. Megjithëse me të madhe flitet për kalimin e tij në njërën nga klubet e njohura të Spanjës, Ronaldo ka thënë se ai ende është futbollist i Mançester Junajtedit.
“Jam ende anëtar i Mançesterit dhe po përpiqem të luaj sa më mirë për të kontribuar për këtë klub. Nëse gjërat shkojnë mirë, dëshiroj të mbetem në ‘Old Trafford’. Nuk jam ‘galaktik’ i Realit, sepse dua të lë gjurmë në historinë e Mançesterit”, ka thënë 22-vjeçari Ronaldo, i cili nuk e ka fshehur dëshirën që me “Djajtë e kuq” të vazhdojë kontratën së paku edhe për dy vjet. Nëse lideri i Ligës Premiere e pranon ofertën e Realit të Madridit, atëherë ky do të jetë transferimi më i shtrenjtë në historinë e klubit spanjoll. Rekordin e deritashëm e mban Zinedin Zidan, i cili në vitin 2001 për 75 milionë euro nga Juventusi kaloi te Reali.

» Ronaldo mbron veten dhe Phelps
» C.Ronaldo ne vemendjen e te gjithve...
» C.Ronaldo, Xhordani i futbollit..!!