Ancelotti: Dua ta përfundoj karrierën tek Roma

Trajneri i Milanit, Carlo Ancelotti, ka zbuluar se do të dëshironte që t’i japë fund karrierës së tij si trajner tek ish-klubi i tij, Roma.
Ish-trajneri i Juventusit, luajti për ekipin romak në periudhën mes viteve 1979 dhe 1987 në rolin e mesfushorit. Ai ishte pjesë e finales së Ligës Kampionëve në vitin 1984, gjatë të cilës Roma u mposht nga Liverpooli.

“Do të doja që ta përfundoj karrierën e time si trajner me ndonjë klub dhe do të dëshiroja që ta bëja këtë me Romën. Do të ishte vërtetë bukur, nuk mund të gjeni një qytet si Roma askund në botë”, ka thënë trajneri italian.

“Humbja e vitit 1984 në garën evropiane ndaj Liverpoolit ka qenë një zhgënjim i madh, sidoqoftë kjo është e kaluar dhe kohët kanë ndryshuar, por një ditë do të doja që kjo të ndodhë. Kush e di, ndoshta kjo mund të ndodhë edhe këtë vit”, ka shtuar Ancelotti.

Milan ka qenë larg formës që pritej nga kjo skuadër, duke u eliminuar herët nga Liga e Kampionëve, ndërsa aktualisht renditen në vendin e gjashtë të Serie A dhe me gjasa të pakta për arritur vendin e katërt.