Porto nën hetime

Kampioni portugez, Porto është akuzuar për kurdisje të dy ndeshjeve të edicionit 2003/04, atëherëë kur skuadrën e drejtonte portugezi Hose Murinjo.
“Jemi njoftuar për këtë akuzë që është ngritur për ne nga federata portugese e futbollit”, kanë njoftuar zyrtarët e Portos përmes ueb faqes zyrtare të klubit. “Ne kemi kuptuar që ndeshja që e fituam 2:0 kundër Estrela da Amadorës dhe takimi pa gola kundër Beira Mar janë duke u hetuar.

Në këtë hetim është përfshirë edhe presidenti i skuadrës Horge Pinta, pasi akuzohet për manipulim me gjyqtarët”, kanë bërë të ditur drejtuesit e Portos. Murinjo ka drejtuar Porton në atë edicion, duke e fituar titullin e Ligës së Kampionëve si dhe titullin e ligës portugeze, para se të kalonte tek Çelzi, por kjo nuk do të thotë se emri i tij është pjesë e këtij hetimi. Nëse akuzat që janë ngritur për Porton vërtetohen, atëherë skuadra mund të dënohet me pikë, mund t’i shqiptohet dënim i rëndë në të holla, ose edhe mund t’i merret titulli i fituar në edicionin 2003/04.