Bariç: Bjellorusija duhet marr seriozisht punën

Titulli: Bariç: Bjellorusija duhet marr seriozisht punën 15/11/2007, 00:48

Trajneri kuqezi Oto Bariç deklaroi se duhet patjetër fitore me Bjellorusinë dhe një pikë me Rumaninë

I bindur për një fitore ndaj Bjellorusisë të shtunën në "Qemal Stafa" është trajneri i kombëtares, Oto Bariç. Dje, në konferencën e tij të parë për shtyp, kroati karizmatik shpalosi synimin e tij për takimin e radhës, ku theksoi se duhet patjetër fitore, për të menduar më pas një rezultat pozitiv me Rumaninë e kualifikuar për në Euro 2008. Trajneri kuqezi, i cili do ta ndjekë takimin nga tribuna për shkak të pezullimit, u ka bërë me dije lojtarëve që përballja e së shtunës duhet marrë shumë seriozisht, pasi Bjellorusia ka një ekip solid, i cili mund të të hapë punë. Ai u shpreh se formacioni do të shpallet të enjten, ndërkohë që konfirmoi se do të luhet me 2 sulmues. "Na presin dy takime shumë të rëndësishme për klasifikimin përfundimtar në grup. Duhet të fitojmë me Bjellorusinë dhe të mos humbasim me Rumaninë. Me formën e mirë që ka shfaqur ekipi, jam i bindur se do të fitojmë të shtunën.
Megjithatë, mund të them se Bjellorusia ka një skuadër solide dhe takimi duhet marrë shumë seriozisht ndaj tyre. Ata kanë humbur në fushën e tyre me Luksemburgun, por ne nuk duhet të ndikohemi aspak nga kjo. Në tri takimet e fundit kemi luajtur shumë mirë. Por mua më vjen keq që rezultati nuk i është përgjigjur lojës që kemi zhvilluar. Pa dyshim që me Holandën duhet të merrnim një pikë, ndërkohë që në Slloveni me atë që dhamë pjesën e dytë mund të arrinim fitoren. Shto këtu edhe barazimin brenda me Bullgarinë, mendoj se në tri takimet e kaluara i meritonim pesë pikë. Mund t'ju konfirmoj se loja e ekipit ka ardhur gjithnjë në rritje. Por ne duhet të punojmë shumë seriozisht këtë javë, për të fituar të shtunën. Sot (dje) kam bërë një mbledhje të gjatë me lojtarët, ku ua kam bërë të qartë se si duhet të luajmë ndaj Bjellorusisë.
Të tilla mbledhje do të bëjmë shumë herë në muajt e ardhshëm, sepse ne do të vazhdojmë bashkëpunimin edhe për dy vjet të tjera. Formacionin do ta shpall pas dy ditëve, ndërkohë që me Bjellorusinë do të luajmë me dy sulmues. Problemi i vetëm që kemi para këtij takimi është dëmtimi i Haxhit, por në këtë moment unë nuk mund të them nëse ai do të bëhet për të luajtur. Mjekët vendosin këto ditë, por mendoj se ai, edhe pse i dëmtuar, ka bërë shumë mirë që ka ardhur pranë kombëtares, sepse do të bëjë fizioterapinë për t'u rikuperuar në kohë. Gjithsesi, edhe nëse Haxhi nuk do të bëhet për të luajtur nga fillimi, kemi lojtarë të tjerë, të cilët do të dinë ta zëvendësojnë,"- u shpreh trajneri i Shqipërisë Oto Bariç. "Bogdani dhe Kapllani do ta gjejnë golin"
I pyetur nëse e shqetëson mosshënimi i golave në këtë periudhë nga sulmuesit Erion Bogdani dhe Edmond Kapllani, trajneri kuqezi ishte i bindur se ata do të dalin ta gjejnë rrugën e rrjetës, ndërkohë u shpreh i kënaqur nga forma e Bushit dhe Salihit. "Natyrisht që më shqetëson ky fakt, por ka edhe momente që sulmuesit kalojnë periudha të gjata pa shënuar. Megjithatë unë kam besim se ata do ta gjejnë golin shumë shpejt, pse jo ndaj Bjellorusisë. Nuk duhet të harrojmë që muaj më parë Kapllani pothuajse shënonte rregullisht, gjithashtu edhe Bogdani. Nga ana tjetër është mirë që Salihi dhe Bushi po shënojnë. Në këto dy takime do t'i aktivizoj të katërt sulmuesit dhe besoj se ata do ta kenë mundësi për të shënuar." "Me Kapllanin dhe Canën, asnjë problem" Bariçi pohoi dje gjatë konferencës për shtyp se është takuar me Canën dhe Kapllanin, ku ka biseduar gjatë dhe tashmë nuk ka më asnjë problem.
Kujtojmë që me sulmuesin Kapllani, trajneri kroat pati një incident në pushim të takimit me Holandën, ndërsa me kapitenin e Marsejës, Cana, kishte polemika në distancë, nisur edhe nga deklarimet e tyre në media. "Kam biseduar me të dy lojtarët dhe nuk ka më asnjë problem, sepse u sqaruam për gjithçka. Kapllani më kërkoi falje për gabimin që kishte bërë dhe unë e thirra përsëri në ekip, ndërkohë që me Canën folëm për gjëra të tjera, të cilat unë nuk mund t'i deklaroj." "Nuk dua të flitet më për kontratën" Edhe pse ende nuk e ka firmosur zyrtarisht kontratën me presidentin e FSHF-së, Armand Duka, Bariçi u shpreh se nuk dëshironte të fliste më për këtë temë, pasi për të gjithçka është e mbyllur. I pyetur për atë që i kishte ndodhur paraardhësit të tij, Hans Peter Brigel, kur gjermani nuk firmosi në momentet e fundit, kroati tha se nuk i njihte si problem. "Nuk do të ishte normale që të flitej më për kontratën. Për këtë gjë kanë biseduar dy njerëz seriozë dhe kanë rënë dakord, kështu që është e kotë ta diskutojmë.
Për sa i përket Brigelit, unë nuk i njoh problemet që ai ka pasur për të nënshkruar kontratën. Për këtë duhet pyetur presidenti, jo unë." "Objektivi i botërorit varet nga grupi" Kroati i pankinës kuqezi nuk ngurroi të deklaronte se për eliminatoret e botërorit do të bëhen hapa të mëtejshëm, por për të objektivi varet nga kundërshtarët që do të bien në një grup me Shqipërinë. "Pas përfundimit të këtyre dy takimeve eliminatore ne do të mbyllim një cikël. Mendoj se do të bëjmë hapa të mëtejshëm për të ardhmen, por për sa i përket objektivit për eliminatoret e botërorit 2010, kjo varet nga grupi që do të kemi. Nëse në grup na bie Italia dhe një skuadër tjetër e një niveli, unë nuk mund të them që do të pretendojmë vendin e dytë në grup. Pra, duhet të dimë kundërshtarët, pastaj të flasim. Në radhë të parë, duhet të përmirësohemi akoma, për të pretenduar kualifikimin, i cili është shumë i vështirë për t'u arritur nëse në grup ke skuadra të nivelit të Italisë apo Gjermanisë." "Sllavko Kovaçiç e di mendimin tim"
Siç dihet, Oto Bariç do ta ndjekë nga tribuna takimin me Bjellorusinë, pasi është i pezulluar nga UEFA për shkak të incidentit me gjyqtarin ndaj Holandës. I pyetur për këtë, ai u shpreh se nuk do të jetë një problem i madh, sepse Kovaçiçi është në një mendje me të. "Kova (kështu i thërret Bariçi) e di atë çfarë unë mendoj dhe besoj se nuk do të ketë asnjë problem. Do të jemi bashkë gjithë javën për ta përgatitur ekipin. E njëjta gjë më ka ndodhur edhe në kohën kur kam drejtuar Salcburgun, në gjysmëfinalen e Kupës së Austrisë. Atëherë patëm fat dhe fituam, gjë që shpresoj ta bëjmë edhe këtë herë. Unë nuk mund të them se si do të komunikoj gjatë ndeshjes, pasi kjo nuk më lejohet,"- tha trajneri kuqezi, duke e përfunduar me humor konferencën për shtyp, në ambientet e hotel "Adriatikut".

» Lutet per nje paciente, infermierja rrezikon punen