Ron Denis, akuzat dhe gjykata!

Ish punonjësi hedh në gjyq pronarin e McLarenit. Seancat e ardhshme janë vendimtare
Racist dhe antihomoseksual janë akuzat, për të cilat duhet të mbrohet Ron Denis, që e ka parë veten të hedhur në gjyq nga një ish punonjës shërbimi në avionin e tij privat, i quajtur Piter Boland, i cili pretendon se është pushuar nga puna nga bosi i skuadrës McLaren, sepse dyshohej se ishte homoseksual.
Piter Boland është inxhinieri i lindur në Hong-Kong, por banor në Staumarket, në Safolk, i punësuar në vitin 2002 nga Absolute Taste (një firmë e specializuar për shërbimet e garave të Formulës 1), por më pas ka kaluar te Greyscape (kompania private që merret me fluturimet e avionit të Denisit).
Sipas tij, bosi miliarder madje ka lëshuar edhe shprehje raciste, gjatë një udhëtimi në Lindjen e Mesme. Ai akuzohet se ka thënë që “duhet të lajë dorën, pasi ka takuar arabët gjatë gjithë ditës”.

Robert Kubica intensifikon impenjimin e tij me makinat kart, në bashkëpunim me ndërtuesin Birel: “Dua të bëj diçka aktive në këtë sport,” - ka thënë piloti polak. Formula 1 kërcënohet nga kriza botërore financiare, e cila e ka detyruar botën e këtij sporti t’i ulë kostot, ndërkohë që në MotoGP disa skuadra historike, si Kawasaki, janë në vështirësi të jashtëzakonshme, dhe pilotë si Marko Melandri mund të mbeten pa punë.
Edhe bota e pilotëve të Formulës 1 mundohet të shohë drejt së ardhmes dhe, në këtë mënyrë, edhe Robert Kubica, i katërti në botërorin e kaluar, ka vendosur të investojë në botën e makinave kart, duke intensifikuar impenjimin e tij me konstruktorin Birel.
Në vitin 2009 piloti polak do të ketë rol aktiv në drejtimin e një skuadre të re (që do të mbajë emrin e tij), skuadër që do të marrë pjesë në ngjarjet më të rëndësishme të këtij sporti. “Më ka pëlqyer gjithnjë bota e makinave kart, - pohon piloti i skuadrës BMW, - një botë zbavitëse, me shumë konkurrencë e pak politikë. Kam dëshirë të luaj rol aktiv në sportin që më mundësoi të kaloja në F1.”