Teliti: Shqipëria, zyrtarisht numër të saktë të popullsisë

Për herë të parë, të paktën dy dekadat e fundit, Shqipëria ka zyrtarisht një numër të saktë të popullsisë. Drejtori i Përgjithshëm i Gjendjes Civile, Armand Teliti, deklaroi se numri total i popullisë është 4 milion e 249 mijë e 942 shtetas, ndërsa numri i zgjedhësve është 3 milion e 133 mijë e 248. Gjithashtu Teliti konfirmoi se regjistri Kombëtar i Gjendjes Civile, është i pastër nga dublimet, ndërsa është përgatitur edhe lista e votuesve për çdo njësi të qeverisjes vendore. Regjistri kombëtar u arrit të pastrohej nga 50 mijë e 892 dublimet. Sipas tij, tashmë është përgatitur lista e personave të cilët janë pastruar dhe një listë e veçantë do t’i dërgohet çdo Zyre të Gjendjes Civile për të kryer hapin final të pastrimit të dublimeve, atë të çregjistrimit nga Regjistrat Themeltarë. Për shkak të lëvizjeve të kryera ndërmjet njësive, rezulton një numër total prej 88,000 ose 3% zgjedhësish, pa një numër të saktë Qendre Votimi.