Meshkujt sillen si qenie instiktive

Titulli: Meshkujt sillen si qenie instiktive 13/11/2007, 18:16

"Franca" është hoteli ku kanë kaluar momentet më magjike të lidhjes së tyre. Duket sikur ishte dje. Dashuria është ende shumë e fortë, por ja që ata janë të divorcuar. Ai e do ta ketë të gjithën të tijën, ndërsa ajo nuk mund të jetë një pronë. Sapo janë ndarë ligjërisht, edhe pse të ndarë faktikisht jetojnë prej tre vjetësh. Ky takim në Hotel "Franca" është një rast i mirë për të kujtuar, por edhe për të bërë një bilanc të asaj që shkoi, për të gjetur ku u gabua. Kjo është linja sipas të cilës ndërtohet drama "Hotel Franca" e cila shfaqet përgjatë tri netëve në vazhdim në skenën e vogël të Teatrit Kombëtar. Regjisori Erion Kame, duke pasur parasysh përvojën e tij akoma rishtare por të suksesshme në teatër, ka vendosur të rrezikojë sërish. Nëse para një viti këtë e bëri me "Dashnorin" e Harold Pinterit, tani ka zgjedhur një vepër të vështirë, të një shkrimtareje të vështirë. Është "Muzika 2" e Marguerite Duras (Margaritë Dyras), një kapriçio filozofike e shkrimtares e cila është e njohur përtej Francës më së shumti si prozatore. "Është një vepër shumë filozofike dhe psikologjike, me mesazhe të fshehura thellë në të. Kështu që na është dashur të bëjmë një punë hulumtuese të madhe për të zbërthyer veprën", - thotë regjisori Erion Kame që kur përmend filozofinë e Durasit tek "Muzika 2" e ka fjalën për një konflikt mes pasionit dhe lirisë.

» Femrat dhe meshkujt, lumturia