Policia bastisë shtëpinë e Winehouse

Policia ka bastisur shtëpinë e këngëtares, Amy Winehouse, në Londër, duke shfrytëzuar levë për të hapur me forcë derën. Zëdhënësi i këngëtares ka thënë se ajo nuk është gjetur aty në atë kohë, dhe se, kjo bastisje nuk është kryer për shkak të drogës.
Mediat britanike thonë se bastisja është e lidhur me arrestimin e burrit të Winehouse dhe një varg njerëzish tjerë. “E vetmja gjë që mund t’ju them është se, kjo nuk ka të bëjë asgjë me drogë dhe se Amy është mirë dhe nuk është akuzuar ose arrestuar”, ka thënë zëdhënësi i saj.
Policia ka ndërmarrë disa aksione të bastisjes, gjatë të enjtes, duke mos e kursyer as shtëpinë e këngëtares. Mediat raportojnë se kërkimet kanë lidhje me burrin e Winehouse, Blake Fielder-Civil, i cili duhet të paraqitet në gjyq gjatë javës së ardhshme, pasi është akuzuar për goditjen e një banakieri.
Muajin e kaluar Amy Winehouse dhe Fielder-Civil u arrestuan në Norvegji dhe u gjobitën me 500 euro për posedim të marihuanës.