Ronaldinjo: Kritikët nuk mund të më shkatërrojnë

Ylli i Barcelonës, Ronaldinjo në një bisedë për revistën gjermane “Vanity Fair”, ka thënë se kritikat në adresë të tij nuk do të mund ta shkatërrojnë. “Sigurisht ka shumë njerëz keqdashës. Por, zërave të tillë unë nuk ua vë veshin.
Kritikët nuk do t’ia arrijnë qëllimit të tyre për të më shkatërruar. Askush s’do të mundet ta shkatërrojë Ronaldinjon. Nuk ka kritikë që mund të ma marrë shpirtin”, ka theksuar Ronaldinjo, i cili nuk u përfshi në mesin e 16 futbollistëve për ndeshjen e Kupës së Mbretit kundër Valencisë. Kritikat për simulime dhe për një formë jo të mirë e kanë bërë më këmbëngulës brazilianin dhe ai qëndron i vendosur ai dhe klubi i tij janë duke shkuar drejt suksesit.

“Derisa të jam i motivuar, nuk do të lejoj të destabilizohem. Kritikat vetëm do të më ndihmojnë dhe do të më bëjnë më të mirë. Jam i bindur se Barcelona sërish mund të fitoj trofe dhe atë me Ronaldinjon e vërtetë. Futbolli pa trofe është i bezdisshëm, kurse kur skuadra nuk luan mirë, atëherë normalisht se ndjeheni shumë i zhgënjyer. Këtë duhet ta ndryshojmë, mungesa e trofeve nuk guxon të vazhdojë”, ka nënvizuar Ronaldinjo.