Pritet miratimi i "Aplikimin e Shqipërisë në BE"

Kuvendi pritet të miratojë nesër, në seancë plenare, projektrezolutën "mbi aplikimin e Shqipërisë për anëtarësim në BE". Dokumenti, i propozuar nga grupi i PD-së, dy ditë më parë, mori konsensusin e opozitës, gjatë diskutimit në komisionin e Jashtëm. Pas disa ndryshimeve, të propozuara nga anëtarët e këtij komisioni, u ra dakord që projekti t'i përcillet Parlamentit për miratim. Drafti, nxit Qeverinë shqiptare, që në fund të muajit, të paraqesë kërkesën lidhur me aplikimin për statusin e vendit kandidat në BE.