KQZ, miraton në parim mandatet

Komisioni Qëndror i Zgjedhjeve miratoi sot në parim aktin, që ndan mandatet për deputet, për çdo zonë zgjedhore të Shqipërisë. Por, me kërkesë të përfaqësuesve të partive politike, të akredituar pranë KQZ-së, komisioni vendosi ta shtyjë për të enjten shqyrtimin dhe miratimin, në hollësi të aktit. Përfaqësuesit e partive politike kërkuan kohë, për të krahasuar të dhënat e aktit, me ato të regjistrit kombëtar zgjedhor nga gjendjet civile. Pasi të miratohet nga KQZ-ja, numri i mandateve të deputetëve për secilën zonë zgjedhore, do t'i paraqitet Kuvendit, që do ta votojë me procedurë të përshpejtuar. Megjithëse nuk është saktësuar, numrin më të vogël të deputetëve do ta ketë qarku i Kukësit dhe më të madhin, Tirana.