Ekuador:Shtatë viktima nga rënia e një avioni

Fatkeqësi ajrore në kryeqytetin e Ekuadorit – Kito. Të paktën shtatë persona humbën jetën pasi një aeroplan i vogël ushtarak u rrëzua në një ndërtesë katërkatëshe banimi në lagjen e pasur në veri të qytetit afër rezidencës së ambasadorit amerikan. Ai nuk është lënduar. Midis viktimave janë tre ushtarë dhe dy civile që gjendeshin në fluturake, si dhe dy civilë në tokë. Ekipet e shpëtimit i nxorën disa banorë që mbetën gjallë të cilët janë në gjendje stabile. Ndërkaq, fatkeqësia ndodhi mbrëmë vonë kur aeroplani i tipit “Bikraft” ishte në stërvitje. Kushtet e motit ishin të këqija, me mjegull të dendur në rajon. Rrethanat e sakta të incidentit po hetohen. Aeroplani u rrëzua në rajonin e njëjtë kur në vitet e 90-ta ranë edhe katër aeroplanë të tjerë.