Albert Ukelli

Kohë në jetë

Jemi protagonistë të kësaj kohe
Kohë në jetë
Se jeta nuk ndryshon
Ndryshojnë veç kohët
Miku im

Albert Ukelli

Grila të thyera
(Ngjarjeve të 1 tetorit 1997 ne Kosove)

Ndër dhëmbë na ishte ngujuar fjala prej kohësh
Fjala e lirë
Ndër grila na ishte ngujuar
Lapsi
Dashuria
Jeta
Ndryshku gërryente bankat
Ku thurëm këngë lavdie
Kohë pa kohë
Shekuj
Tetor pragshekull i ri
Fjala doli nga dhëmbët
Lapsi theu grilat
Në banka u ulëm thurëm këngë lavdie
Mposhtëm ankthin e zi
Kohën e bëmë për vete
Në shekullin e ri
(Prishtine, '99)

Albert Ukelli

Regjentë pa kontratë

Kënga e bulkthit nuk më lë të fle këtë natë
Se është regjentë pa kontratë në këtë rrethinë
Është dimër
Ftohtë
Cakëllova gotën me raki bullut
Me dhëmbët e mi
Mora e ia thashë këngës së bilbilit
Bulkthi mori datën
Ndali zë
Cakëllova dhe një gotë
Prapë këndova
Edhe pse nuk kishim bërë ndonjë kooptim me bilbilin
Bulkthin e detyrova të marrë datën

Albert Ukelli

Dallgë deti është jeta

Dallgë deti e pafund
Është jeta
Ne jemi notues që luftojmë
Të mos zhytemi
Të mos mbytemi
Të mbetemi fitimtarë
Nëpër dallgë jete
Të gjallë

Albert Ukelli

Një ditë në Tiranë

Piramidë kishe jetën në sheshin e botës
Sa armiq t’u sulën u përplasën në majën e saj
Në sheshin tënd shfletoj historinë
Pranë piramidës
Afër kam Monumentin
Skënderbeu rri kalëshalë
Një valle trimash pas çdo fitoreje
Më shfaqet përballë
Njomë buzët e shkrumbuara me ujin
Që shekull kisha jetën sa ëndërrova
Fugimthi lëshoj sytë në çdo qoshe
Vargmalet e Naimit më flasin me zërin e lirisë
Merr detyrë tejbartëse të dashurisë
Ndër mote
Nga Kosova në zemër të Shqipërisë
(Tiranë, 5 shtator 2000)

Albert Ukelli

Imazhe

Një melodi e vjetër
Nga Moxarti
Formoj imazhe
Dy njerëz dy qenie
Dy gjini
Njëri nga Marsi tjetri nga Afërdita
Kishte për të thënë Grej
Dy jetë të ndryshme
Të ndara
Në kohë
Në tokë
Të bashkuara
Në jetë

Albert Ukelli

Kërkim i harlisur

Mot i lagatershëm në këtë vend
Ngucje ndjenjash herë pas here
Në kasollen njëdirekëshe
Përcëllohem nga vapa
Lagem me pikat e shiut në të njëjtën kohë
U ngjaj shaptoreve
As retë në qiell që shkasin pa ndarë nuk më ndalin
..Fluturoj
Flitet se diku u gjendka një floçkë
Në këtë vend ku jam unë
Gërshetova një kurorë lulesh në kamuflim
Për flokët e verdha të saj
Jam në kërkim
„Ilegalisht"
Hallavitem rrugëve
Në këtë vend me mot të lagatershëm
As vetë nuk mund ta di
Në mos është apo jo
Një komplot me vetveten

Albert Ukelli

Dikur

Dikur me leqenik bëmë trupin
Nuk u zgropem kurrë
Zahire mbajtëm për miq e shokë
Drapëruam grurë e misër
Therëm qengjin më të mirë
Pimë nga një gotë
Ia thamë këngës
Tregimtarët e shumëdashur folën qetë
Punëtorët stinorë dëgjuan me ëndje
Vashëzat tutje punuan rrogoz për oda
Pllenuan lulen e thurën kurorë
Me leqenik bëmë trupin
Ishim punëtorë stinorë
Por nuk ishim vonestarë

Albert Ukelli

Dashuri dogançe

Dogançe flasim unë dhe ti
Në dhomën e vogël
Tymosur me duhan nga unë
Çikohemi me ujë nga brendësia e tokës
Shuajmë etjen në brendësi të trupave tanë
Takohemi te kryqja në gërgalle
Duhemi dogançe
Unë të hyjnizoj
Jemi forcëdhënës në jetët tona
Ani se dogançe

Albert Ukelli

Natë

Melodi qetësie brenda në dhomën e errët
Mbaj një libër në dorë
Përkëdhel faqet e saj plot dritë
Për sytë e mi

Albert Ukelli

Fotografitë

Fotografitë tuaja sot nuk më bëjnë punë
Nuk ma shuajnë mallin që kam
Gjithçka kanë fotografitë
Sytë, faqet, duart, dhëmbët tuaj
Veç erë nuk kan
As s'prekë dorë e juaj

Albert Ukelli

Në pritje të mëngjesit

Edhe pse ti je eklipsuar diku
Unë të pres
Simfoninë e dhimbjes
Bashkë me preluden e tingujve të paqenë
Në këtë natë
Do t'i transformojë me orët e mia lokale
Në pritje të mëngjesit