Izolohet kënga e Evropianit

Titulli: Izolohet kënga e Evropianit 13/11/2007, 17:12

Izolohet kënga e Evropianit

Asnjë koncert jashtë vendit deri tani për të promovuar këngën shqiptare para Festivalit Evropian. Grupi shqiptar niset në 2 maj drejt Helsinkit
Duket se Frederik Ndoci po e pret me padurim 2 majin. Thotë se e ka ëndërruar që fëmijë, që atëherë kur sapo nisi të mësonte se ç'ishte muzika. Dhe tani është duke jetuar ëndrrën. Në datën 2 maj grupi shqiptar niset për Helsinki ku zhvillohet edicioni i 52-të i Festivalit Evropian të Këngës. "Pjesëmarrja është sukses, nëse arrijmë ndonjë renditje të mirë, atëhere suksesi është edhe më i madh", - thotë Ndoci që ndodhet para gazetarëve për të bërë një prezantim të fundit para udhëtimit drejt Evropianit. Megjithë punën intensive për ta sjellë këngën në parametrat e kërkuar, realizimin e një videoklipi, regjistrimi dhe masterizimi në Itali, etj., etj., sërish mbetet një pikë e errët. Është pikërisht promovimi.

Edhe pse u premtua shumë që nuk do përsëritej rasti i një viti më parë, kur kënga shqiptare u prezantua për të parën herë në skenën e Festivalit, deri tani përveç shpërndarjeve të DVD-ve dhe CD-ve nuk është bërë asgjë tjetër. "Kjo është ana më e errët (blu e errët). Kemi pasur shumë ftesa nga Spanja, Portugalia, Luksenburgu, Anglia, por nuk kemi vajtur askund. Dogjëm Izraelin dhe nëse nuk shkojmë, djegim edhe Maltën nesër. Interesi ka qenë i madh. Kemi marrë urime, madje me superlativa, megjithatë…", - thotë Frederik Ndoci. Sipas bashkëshortes së tij, Aidës, arsyeja duhet të jetë financiare. "DVD-të janë shpërndarë ngado, por është tjetër gjë të shkosh e të këndosh live, të grumbullosh fansa më shumë, që do të thotë vota më shumë", - thotë Aida, teksa shpreson që të bëhet diçka deri në datën 2 maj. Në Festivalin Evropian, Frederik Ndoci prezanton këngën shqiptare "Balada e gurit", e kompozuar nga Adrian Hila mbi poezinë e Pandi Laços, fituese e edicionit të fundit të Festivalit të Këngës në Radio Televizionin Publik Shqiptar.

» Jorgo Telo