Orkestra e RTSH si në kohët e ndritura

Titulli: Orkestra e RTSH si në kohët e ndritura 13/11/2007, 17:17

Orkestra e RTSH si në kohët e ndritura
45 vjet Orkestra e RTSH

Orkestra Simfonike e RTSH-së u themelua më 16 maj të vitit 1962 si formacioni orkestral më i madh i kohës. Orkestrantët ishin kryesisht muzikantë të rinj, që studiuan në vend, si dhe nga profesionistë të specializuar në Pragë, Moskë, Laipcig etj. Fillimisht u quajt “Orkestra Simfonike e Radios dhe Kinematografise”. Krijimi i saj shënoi një etapë të re në zhvillimin kulturor dhe artistik në Shqipëri. Koncerti i parë u realizua më 20 gusht të po atij viti nën dirigjimin e Mustafa Krantjes dhe u luajtën vepra të Haydn, Mendelssohn dhe Mozart. U ekzekutuan dhe u regjistruan veprat e kompozitorëve shqiptarë Zadeja , Harapi, Daija, Grimci, Çangu, Lara, etj., për të vijuar me brezat më të rinj si Gaqi, Dizdari, Kushta, Lara, Peçi, Shupo, etj. Gjithashtu u realizuan produksionet muzikore për shumicën e filmave shqiptarë.
Do ketë shumë ngjyra, histori, pasion, ndonëse një koncert është pak për të përshkruar 45 vite jetë. Më 31 maj, në orën 20.00, në sallën e Teatrit të Operës dhe Baletit, shfaqet koncerti “Gala” i Orkestrës Simfonike të Radio Televizionit Shqiptar me rastin e 45- vjetorit të krijimit të saj. Vepra të zgjedhura nga autorë në zë të muzikës shqiptare si Zadeja, Zoraqi, Ibrahimi, Laro, Gaqi dhe nga repertori botëror, Beethoven, Bellini etj. Është një koncert homazh për gjithë ato figura që kontribuan në ngritjen dhe rritjen e këtij formacioni. Në këtë natë “Gala” janë të ftuar ish-instrumentistë të orkestrës, që tashmë jetojnë jashtë vendit si dhe dirigjentët Eno Koço dhe Ermir Krantja, që i kanë kushtuar vite jetë kësaj orkestre. I ftuar special është tenori Josif Gjipali, që po zhvillon me sukses një karrierë ndërkombëtare. Koncerti paraprihet nga një ceremoni tjetër më 30 maj, ora 20.00 në Radio Tirana ku të pranishmit do të vizitojnë studiot e orkestrës, si edhe një ekspozitë me aktivitetet e saj në vite.