Johnny Depp i pakonkurrencë

Aktori amerikan për të tretën herë me radhë udhëheq në listën e të famshmëve të cilët adhuruesve me dëshirë u shpërndajnë autografe. Do të mund të futej në histori, nëse nuk ia kalojnë Matt Damon e George Clooney.
44-vjeçari Johnny Depp, i cili të enjten është nominuar për Globin e Artë për filmin e përgjakshëm muzikor Sweeney Todd, do të mund të bëhej shpërndarësi më i mirë i autografeve i të gjitha kohërave në Hollywood, ka thënë Steve Cyrkin, redaktor përgjegjës i revistës Autograph me seli në California.

Pas Johnny Deppit në listën e yjeve të cilët me dëshirë japin autografe janë dyshja nga filmi “Ocean's Thirteen”, Matt Damon e George Clooney, derisa në vend të tretë gjendet Jack Nicholson.

Komiku Will Ferrell në anën tjetër gjendet në maje të listës së shpërndarësve më të këqij të autografeve. "Është i keq për shkak se haptazi i përqesh ata që kërkojnë autograf prej tij", ka thënë Cyrkin.

Aktorët Tobey Maguire, Joaquin Phoenix e William Shatner, gjithashtu janë në listën e më të këqijve, së bashku me Renee Zellweger, Bruce Willis e Teri Hatcher.