Presidenti Sarkozy martohet me modelen Carla Bruni

Presidenti i Francës, Nicolas Sarkozy, u martua me të dashurën e tij, këngëtaren dhe modelen Carla Bruni. Sipas njoftimeve, ceremonia u zhvillua të shtunën në mëngjes në Pallatin Elysee me pjesëmarrjen e miqve të ngushtë dhe të rrethit familjar.
Nusja ishte veshur me fustan të bardhë. Dëshmitarë të kësaj lidhjeje martesore ishin Nicolas Bazire– aleat i ngushtë politik i Sarkozyt dhe Mathilde Agostinelli, drejtore e marrëdhënieve me publikun për firmën Prada.

Sarkozy u divorcua nga gruaja e tij e dytë, Cecilia, në muajin tetor dhe filloi të shoqërohej me Carla Brunin në nëntor. Marrëdhënia e tyre mori publicitet të madh në media. Anketat tregojnë se shumë francezë janë shprehur kundër natyrës publike të kësaj marrëdhënieje mes tyre.

Është hera e parë në histori që një president i Francës martohet në kohën që është në post.