Zbulohet i dashuri muzikant i TUNES

Megjithëse është përpjekur gjithmonë të mos flasë në lidhje me jetën e saj private, Tuna nuk ka arritur sërish t’i mbajë larg vetes fjalët, që thuhen për të. Por këtë radhë më shumë, se fjalë të thëna në ajër ato janë fjalë, që lançohen në një prej faqeve shqiptare në internet. Bëhet fjalë për albaniac. com, që shkruan se ka zbuluar tashmë të dashurin e këngëtares. Në këtë faqe në internet flitet për një lidhje të Tunës me anëtarin e grupit muzikor “Skillz”.
Djali quhet Ledri dhe përveç lidhjes, që ka me të këngëtarja ka bashkëpunuar për realizimin e një dueti muzikor. Në fakt duket, se ky ka qenë ngacmimi për të folur për një marrëdhënie më shumë mes tyre. Në faqen në internet shkruhet, se në këtë mënyrë çifti e ka bërë publike lidhjen e tyre, gjë që duket se vetë këngëtarja e mohon. Në një bisedë telefonike, që patëm me të ajo nuk ka pranuar kurrsesi të japë detaje lidhur me këtë lajm, e për më tepër nuk ka dashur të bëjë asgjë publike. “Kam qenë gjithmonë e distancuar nga lajmet rreth jetës sime private”, është shprehur. Nga ana tjetër në intervistat e saj në të shkuarën, Tuna gjithmonë ka pranuar, se ka një raport intim të qëndrueshëm dhe se i dashuri i saj është muzikant, anëtar i një grupi muzikor. “Kam thënë gjithmonë, se kam një lidhje të qëndrueshme dhe stabël, por nuk dua të jap asnjë koment më shumë”, ka përfunduar Tuna. Në forumet e kësaj faqeje në internet fansat shprehen se këngëtarja është duke e jetuar këtë marrëdhënie dashurie prej disa vitesh dhe nëse do t’iu referohemi intervistave të Tunës, pa dyshim, që nuk mund të jetë ndryshe. Megjithatë vetë ajo dëshiron të ruajë heshtjen, që e ka karakterizuar gjithmonë në këtë drejtim. Kënga, që Altuna Sejdiu ka realizuar në duet me grupin “Skillz” titullohet “Njo” dhe është pjesë e albumit, që grupi ka nxjerrë në treg. E ndërsa nuk e kemi parë kohët e fundit as në ekranet dhe as në skenat shqiptare, duket se këngëtarja ende nuk ka projekte konkrete të afërta për të ardhur në Shqipëri. Vitin e kaluar ajo ishte pjesëmarrëse në “Top-fest”, ku me këngën “Bileta” arriti jo vetëm një çmim, por edhe preferencat e padiskutueshme të publikut, si për këngën ashtu edhe për aftësitë vokale. Pak javë më parë, emri i saj është lakuar dendur, jo vetëm në mediat shqiptare, por kryesisht në ato Maqedonase. Këngëtarja ka qenë ndër konkurrentët dhe pretendentët kryesorë për të prezantuar Maqedoninë në festivalin Evropian. Pak kohë më parë, ajo u shpreh se dikur kishte menduar të merrte pjesë edhe në festivalin e Këngës në RTSH, por me sa duket korrektesa e këtij aktiviteti muzikor nuk e ka motivuar sa duhet, ndaj edhe zgjodhi festivalin e Shkupit. Gjithsesi, ky fakt nuk ka ndikuar në fansat e saj në Tiranë, që vazhdojnë të jenë të shumtë.