Tola: Do të konkurroj e vetme në Eurovision

Fituesja e Festivalit të Këngës në RTSH, Kejsi Tola, ka mohuar spekulimet e fundit në media, kinse ajo do të paraqitet së bashku me këngëtaren kosovare Flaka Krelani në Festivalin Evropian, i cili do të mbahet në Rusi.

Kënga “Më merr”, me muzikë dhe orkestrim të Edmond Zhulalit dhe me tekst të Agim Doçit, doli fituese e Festivalit të 47-të të Këngës në RTSH, duke marrë vlerësimin e jurisë dhe publikut, dhe do të jetë pikërisht kjo këngë në versionin anglisht me të cilën Kejsi Tola do ta përfaqësojë Shqipërinë në Eurosong.

Së fundmi është përfolur shumë në media që Flaka Krelani do ta shoqërojë Kejsin në Rusi, mirëpo Kejsi ka mohuar se do të këndojë duet me Flakën në versionin e ri të këngës për Eurovision dhe ka pohuar se versioni i dytë i këngës do të shoqërohet me një klip.

“Jo, do të konkurroj e vetme dhe sapo kam përfunduar versionin anglisht të këngës”, ka pohuar Kejsi për “Panorama Plus”.