Mac OS X dhe Windows 7 fitojnë, Linux humbet

Titulli: Mac OS X dhe Windows 7 fitojnë, Linux humbet 13/2/2009, 01:44

Mac OS X dhe Windows 7 fitojnë, Linux humbet

Në bazë të të dhënave të analistëve nga kompania Net Applications, fituesit më të mëdhenj gjatë muajit janar kanë qenë sistemet operative Windows 7 dhe Mac OS. Rritja e përdoruesve të Windows 7 gjatë muajit të parë të këtij viti është krejt e pritur duke marrë parasysh se Microsoft u ka ofruar përdoruesve sistemin e vet më të ri operativ krejt falas.
Në anën tjetër, Mac OS çdo ditë e më shumë po i afrohet kalimit të kufirit prej 10% të pjesëmarrjes në treg. Në raportin e vet “Operating System Market Share” kompania Net Applications pohon se pjesëmarrja e përdoruesve të Mac OS gjatë muajit janar është ndalur në kufirin prej 9.93 %, derisa kjo shifër gjatë muajit dhjetor të vitit 2008 ka qenë 9.63 %.
Megjithatë, nëse shikohet në përgjithësi atëherë mund të themi se Windows ka humbur pjesë të tregjeve dhe pjesëmarrjen e përgjithshme (duke përfshirë të gjitha versionet) në 88.26%, që është një rënie nga 88.68%, sa ka qenë pjesëmarrja në fund të muajit dhjetor. Vendin e tretë me pjesëmarrje prej 0.83 % edhe më tutje e mbajnë distribucionet e sistemit operativ alternativ “Linux”.