Amy Winehouse prapa grilave

Duket që tragjedive private të këngëtares së re, Amy Winehouse, është vështirë t’iu shihet fundi. Ajo tani është arrestuar me akuza të rënda për pengim të ligjit.
Winehouse ka përfunduar prapa grilave pasi që policia e ka arrestuar atë për tentim ndikimi në kontestin ligjor të bashkëshortit të saj. Pushteti ka deklaruar që e ka zënë 24-vjeçaren e cila ka tentuar të ndikojë në gjykatë dhe në procesin i cili po kryhet ndaj bashkëshortit të saj, Blake Fielder-Civil, edhe pse askush nuk ka dashur ta konfirmojë që bëhet fjalë për këngëtaren e famshme.

Mirëpo, lajmin që gruaja në fjalë është pikërisht, Amy Winehouse, e kanë transmetuar të gjitha mediat më të mëdha britanike, nga Sky News deri të Times e Press Association.

Amy Winehouse, pak kohë më parë, i ka pezulluar të gjitha koncertet e saja dhe të gjitha paraqitjet publike, duke marrë parasysh se ashtu i është këshilluar nga mjeku, derisa gjendja e saj psikike, së bashku me problemet nga varësia prej drogës e alkoolit, janë rënduar edhe më shumë kur bashkëshorti i saj, Blake Fielder-Civil, ka përfunduar në burg për një sulm që kishte kryer.

Fielder-Civil është duke u mbajtur prapa grilave sepse ka tentuar të frikësojë një dëshmitar në rastin kundër tij, e sa është e vërtetë që Amy e ka penguar ligjin, ende nuk dihet.