Michelle Rodriguez prapa grilave

Pas Kiefer Sutherlandit, edhe Michelle Rodriguez do t’i kalojë ditët e festave prapa grilave. Në fakt, edhe ajo ka shkelur dënimin me kusht, andaj gjykatësi i ka caktuar 180 ditë burgim.
Michelle Rodriguez ka filluar të shërbejë dënimin e saj 180-ditësh me burg, ka bërë të ditur agjencia e lajmeve Reuters. Ylli i serialit “Lost” është paraqitur të dielën në burgun Century Regional Detention të Lynwoodit, në pjesën jugore të Los Angelesit.

Vendimin për burgosjen e aktores e ka sjellë gjykatësi qysh në muajin tetor, pasi që ajo kishte shkelur dënimin me kusht, të cilën e kishte merituar pas vozitjes në gjendje të dehur dhe ikjes nga policia.

Rodriguez është dashur të kryej edhe punë bamirësie, mirëpo edhe vet e ka pranuar që është shmangur nga ky obligim. Ajo ka shkelur edhe dënimin, sipas të cilit nuk do të guxonte të konsumonte alkool për 90 ditë rresht. Gjatë bartjes së byzylykut për përcjelljen e lëvizjeve, Michelle madje tri herë është zënë në gjendje të dehur.