Katie Holmes merr pjesë në maratonën e New Yorkut

Aktorja e famshme, Katie Holmes, ka qenë njëra nga pjesëmarrëset e maratonës së New Yorkut, që është zhvilluar të dielën në këtë qytet. Ajo e ka përmbyllur këtë garë me rezultat: 5 orë, 29 minuta dhe 58 sekonda.
Bashkëshorti i saj, Tom Cruise, dhe e bija e tyre, Suri, ishin në mesin e njerëzve që e kanë përgëzuar aktoren, për përmbylljen e suksesshme të maratonës.
Holmes, që ishte regjistruar me një pseudonim në këtë garë, nuk ka tërhequr vëmendjen e publikut, i cili nuk ishte në dijeni për pjesëmarrjen e saj. Megjithatë, në fund, rezultati i Holmesit është regjistruar me emrin e saj të vërtetë.
Paula Radcliffe, nga Britania e Madhe, e cila lindi një fëmijë vetëm nëntë muaj më parë, ka fituar maratonën e femrave, me kohë prej: 2 orë, 23 minuta, 9 sekonda. Martin Lel nga Kenia ndërkaq ka fituar në konkurrencën e meshkujve, me kohë të arritur: 2:09:04.
Holmes ka thënë se çdoherë ka dëshiruar të marrë pjesë në këtë lloj të garës, por edhe për të humbur peshën, që e kishte shtuar gjatë shtatzënisë dhe pas lindjes së vajzës Suri, një vit më parë.