Joni Peçi nuk paguan modelet dhe braktis atelienë

Joni Peçi nuk paguan modelet dhe braktis atelienë. Dy lajme që mbërrijnë njëri pas tjetrit, si për të shtuar dyshimet, që lidhen me stilistin e sidomos me marrëdhëniet e tij me paranë.
Se çfarë ka ndodhur me Joni Peçin, këtë nuk mund ta themi me siguri, por jemi mëse të bindur, që atelieja e tij e dikurshme tashmë nuk ekziston, ndërsa vajzat që sfiluan për “Tirana Fashion Week”, nuk kanë marrë ende pagesat përkatëse. Duket se sërish do të detyrohemi të shkruajmë për “Tirana Fashion Week”, një aktivitet që nuk lë shumë mbresa në kujtesë, por ku nis gjithçka. Realisht është më mirë të shkruajmë për gjëra të reja, por ndodh ndonjëherë, që e reja gjendet edhe tek e shkuara. Pas trumbetimit me zë të lartë, që iu bë “Tirana Fashion Week”, nga vetë organizatorët e këtij aktiviteti, tashmë pakënaqësitë dalin prej pjesëmarrësve në sfilatë. Zërat vijnë nga vetë bukuroshet, që sfiluan. Ndërsa vajzat, (disa prej tyre edhe me përvoja të mëparshme në fushën e modës) kishin pranuar të dilnin mbi pasarelë përkundrejt një pagese simbolike, ende nuk po shohin frytet e punës së tyre. Jo se bëhet fjalë për ndonjë shumë të madhe parash, por më tepër për kënaqësinë e një pune, duke pasur parasysh edhe moshën e tyre të re dhe hapat e parë në fushën e modës. Janë rreth 40 persona, vajza dhe djem pjesëmarrës në sfilatat e zhvilluara në Qendrën Ndërkombëtare të Kulturës, të cilët ende nuk janë paguar nga “Joni Peçi Fashion Group” për pjesëmarrjen e tyre në “Tirana Fashion Week”, më shumë se dy javë më parë. Disa prej tyre kanë kontaktuar me Jonin gjatë kësaj periudhe dhe stilisti iu është përgjigjur, që shumë shpejt sapo sponsorët të paguajnë, edhe ata do të kenë paratë. Ndërkohë dikush tjetër pohon, se ka mësuar, që të gjithë modelet do të paguhen, por pasi Joni të kthehet nga Italia, ku do të shkojë për një javë. E ndërsa disa janë me shpresën, që do të paguhen, të tjerë nuk besojnë më që kjo të ndodhë. Por jo të gjithë preferojnë të flasin dhe të tregojnë se si janë realisht faktet. Frensi dhe Anada, janë dy prej vajzave të cilat konfirmojnë lajmin dhe që shtojnë gjithashtu se asnjë prej modeleve nuk është paguar. “Kemi kontaktuar me Jonin dhe na ka thënë se pas disa ditësh do të na japë DVD-të e regjistruara dhe pagesat”, shprehet Anada, e cila shton se ndoshta kjo do të ndodhë pasi stilisti të kthehet nga Italia, ku do të qëndrojë gati një javë”. Të njëjtën përgjigje jep edhe Frensi, e cila shprehet, se Joni i ka thënë, që do të paguajë pasi të marrë paratë nga sponsorët. E ndërkohë të tjerë preferojnë të mos flasin e të mos japin detaje, por gjithsesi pranojnë që pagesat nuk janë bërë. Njëkohësisht, shumë prej vajzave modele, presin të shohin veten si modele në “Fashion TV”, ashtu si Joni Peçi iu kishte premtuar, por asnjë dritë jeshile në horizont. E ndërsa modelet vuajnë çështjen e pagesave, një tjetër lajm mbërrin tashmë jo nga “Joni Peçi Fashion Group”, por nga atelieja e stilistit. Paparaci ynë, përmes fotove që ka sjellë në redaksi konstaton se atelieja e Jonit nuk figuron më si e tillë. Ambienti është i zbrazët, ndërsa duket se gjithçka që i përkiste atij, tani nuk ndodhet më aty. Nga sa mësuam prej personave që banonin aty pranë, stilisti kishte shpërngulur gjithçka mbrëmjen e së enjtes dhe ishte larguar. Përpara pallatit nuk ndodhej as makina e tij “Volvo”, që zakonisht parkohej aty. Nuk dimë nëse Joni do ta shpërngulë diku tjetër atelienë e tij të punës, apo ka pasur ndonjë arsye tjetër për të cilën e ka mbyllur atë. E të gjitha këto lajmë mbërrijnë vetëm dy javë, pas përfundimit të “Tirana Fashion Week”, një aktivitet për të cilin u tha se do të ishte i përvitshëm, por që duket se nuk nisi aspak me këmbë të mbarë. Sepse nëse në sallë gjatë gjithë javës ishin të paktë personazhet VIP, në sfilatë munguan stilistët ballkanikë, të cilëve iu ishte kushtuar gjithë aktiviteti. Mirela Nurçe, stilistja nga Deçani i Kosovës Suzana Susuri, stilisti nga Maqedonia Nenad Sekiraski, “Dielli Fashion” po nga Kosova, “Gledis” po nga Shqipëria, Joni Peçi, si dhe Fatina Dibra e lindur në Tiranë, e diplomuar në Athinë dhe përfaqësoi Greqinë në këtë eveniment. Janë këta emrat e stilistëve pjesëmarrëse në “Tirana Fashion Week”. I vetmi joshqiptar pjesëmarrës ishte Nenad Sekiraski.