Nje analiz e re per diagnostifikimin e kancerit ne prostat

Gjatë një simpoziumi të organizuar nga korporata amerikane Gen-Probe në San- Diego, një grup shkencëtarësh shpallën se kanë zhvilluar një mënyrë të re për analizën e urinës, që mund të përmirësojë dukshëm diagnostikimin e kancerit në prostatë. Gjatë kësaj analize, mjekët shqyrtojnë imtësisht dy gjene të ndërlidhura a bashkuara. Kjo ndërlidhje ndodh te rreth 50 për qind e pacientëve me kancer në prostatë. Gjatë studimit, shkencëtarët morën në shqyrtim burra që dyshoheshin se kishin kancer në prostatë dhe zbuluan se analiza e urinës ishte më e saktë se sa analiza e gjakut për të parashikuar praninë ose mungesën e këtij lloj kanceri. Çdo vit, mbi 200 mijë amerikanë diagnostikohen me kancer në prostatë. Mënyra e tanishme për diagnostikimin e këtij kanceri është një analizë gjaku e quajtur PSA, që kryhet një herë në vit për të matur nivelin e një proteine. Te pacientët me kancer në prostatë, niveli i kësaj proteine shënon rritje. Por, analiza PSA shpesh është e pasaktë, prandaj shkencëtarët menduan që krahas analizës së gjakut të shtonin edhe analizën e urinës për të parashikuar më mirë se cili nga pacientët ka kancer në prostatë dhe cili tumor është më i prirë për t'u rritur e për t'u përhapur. Gjatë kësaj analize, shkencëtarët përpiqen të gjejnë qeliza që kanë dy gjene të bashkuara a të ndërlidhur mes vetes. Gjatë studimit me pjesëmarrjen e 500 burrave që dyshohej se kishin kancer në prostatë, analiza e urinës doli 85 për qind e suksesshme në klasifikimin e personave që nuk kishin shenja kanceroze. Gjithashtu, nëpërmjet kësaj analize të urinës, shkencëtarët arritën të zbulonin kancer në prostatë në 42 për qind të rasteve. Shkencëtarët thonë se gjatë analizës së urinës, te burrat që u zbulua se kishin gjene dyshe në gjakun e tyre, gjasat ishin që tumoret në prostatë të ishte më agresiv e më të ndjeshëm ndaj hormoneve dhe këta pacientë kishin nevojë për trajtim të menjëhershëm. Analiza e re tani po i nënshtrohet studimeve të tjera dhe ende nuk ka filluar të kryhet në klinika. Por, mjekët shpresojnë se studimet në proces do të tregojnë se kjo analizë do të përbëjë një mjet të vlefshëm për zbulimin e kancerit të prostatës dhe përcaktimin e shkallës së agresivitetit të tumorit.