Marilyn Manson akuzohet nga ish-tastieristi Gacy

Ish-tastieristi i këngëtarit Marilyn Manson e ka paditur atë, duke thënë se këngëtari i ka përdorur fitimet e kolegëve të tij të grupit për të blerë gjëra makabre, siç janë skeletet.

Wayne Gacy, emri i vërtetë i të cilit është Stephen Bier, e ka akuzuar Mansonin për blerjen e gjërave “të sëmura dhe të neveritshme” siç janë shandanët e bërë nga eshtrat e njerëzve dhe maskat afrikane të bëra nga lëkura e njerëzve, me paratë që i ka huazuar nga kolegët. Në aktakuzën e dërguar në gjykatë, Gacy ka thënë se është mashtruar me para nga rok këngëtari, emri i vërtetë i të cilit është Brian Warner, për njëzet vjetët e fundit. Ai gjithashtu e ka kritikuar Mansonin për shumën e madhe të parave që ia ka dhënë të dashurës së tij për t’u paraqitur në videoklipin e këngës “Heart Shaped Glasses”, duke thënë se ajo shumë ka qenë “pagesa më e madhe që i është paguar ndonjë aktoreje në çfarëdo videoje muzikore gjatë historisë”. Ndërkaq, përfaqësuesit e Marilyn Mansonit nuk kanë dhënë ende komente mbi këto akuza.