Për një makiazh perfekt

Disa sekrete të vogla për të përdorur më mirë makiazhin. Për të dhënë më të mirën nga vetja dhe një truk që zgjat gjatë gjithë ditës

Për lëkurën
Përdorni një krem hidratant përpara makiazhit, por jo një krem shumë të yndyrshëm, edhe nëse lëkura është shumë e thatë. Bëni kujdes kur të vendosni fondatintën, për të evituar njollat. Nëse është një produkt kremoz, vendosni një sasi të vogël në pëllëmbën e dorës dhe aplikojeni me sasi të vogla mbi fytyrë, duke e përhapur mirë me majat e gishtërinjve. Nëse nuk jeni të praktikuara dhe ndjeni vështirësi më këtë mënyrë, provoni të përdorni një fondatintë kompakte dhe përhapeni me një sfungjer pak të lagur për të një efekt mbulues, dhe të thatë për një shtresë natyrale. Evitoni vendosjen e shtresave të tjera të fondatintës gjatë ditës. Aplikoni korrektorin përpara fondatintës, për të evituar njollat dhe defektet në lëkurë.

Pudra duhet përdorur pa u ekzagjeruar, duke vendosur fillimisht pluhurin në pëllëmbën e dorës përpara se ta vendosni në fytyrë, për të evituar që lëkura të duket shumë e rënduar. Pudra komakte eliminon efektin ndriçues. Toni i faqeve nga njëra anë ndihmon për të pasur një pamje të gjallë, nga ana tjetër rrezikon të lërë njolla. Përdoreni pasi të keni vendosur pudrën dhe përhapeni mirë me penel.


Për buzët
Nëse buzët janë të plasaritura dhe të thara, buzëkuqi nuk do të japë rezultat perfekt. Përdorni më parë një shtresë kremi të yndyrshëm.
Më pas dizenjoni kunturin e buzëve me një laps. Zgjidhni të njëjtën ngjyrë me atë të buzëkuqit. Mos përdorni lapsin për të zmadhuar buzët. Më mirë në këtë rast përdorni buzëkuq të shndritshëm dhe të qartë. Evitoni përdorimin e ngjyrave të ndezura dhe shumë të shkëlqyeshme në buzë të trasha. Për buzë të holla dhe nëse keni defekte me dhëmbët, përdorni buzëkuq në ngjyrë të qartë. Sfumoni buzëkuqin shumë të errët duke vendosur më parë mbi buzë një ton sysh, duke e përhapur me kujdes në buzë, pa krijuar shtresëzime. Nëse toni del jashtë buzëve dhe lë njollë, me një shufër të vogël pambuku të lyer me qumësht pastrues, eliminoni njollën dhe më pas rregulloni vendin e pastruar me pak fondatintë. Për një makiazh që duhet të zgjasë gjatë gjithë ditës, zgjidhni një buzëkuq që nuk përhapet. Shkëlqyesi u jep volum buzëve, por duhet vendosur vetëm në qendër të buzës, pasi të keni vendosur buzëkuqin, për t’i dhënë më shumë dritë buzëqeshjes tuaj. Nëse doni të vendosni buzëkuq gjatë ditës, eliminoni çdo gjurmë që ka lënë buzëkuqi i vendosur më parë, duke e pastruar me një shami të lagur.

Për sytë
Vendosja e rimelit në sasi të mëdha e rëndon shumë pamjen. Para se të vendosni rimelin mbi qerpikë, kujdesuni që furça të mos jetë shumë e ngarkuar. Nëse gjatë lyerjes bëheni pis me rimel, eliminoni njollën me një tampon pambuku të njomur me locion pastrues për sytë. Për të dendësuar qerpikët, dizenjoni në vizë të hollë rrëzë qerpikëve përpara se të aplikoni rimelin. Nëse viza me laps nuk del perfekte, sfumojeni me një penel të butë. Nëse keni sy të lodhur dhe të skuqur, përdorni tone me bazë të ngjyrës rozë, që i jep fytyrës pamje të çlodhur. Kur lapsi i syve ju duket shumë i fortë, ngrojeni për disa sekonda, për të pasur rezultat më të mirë. Për të rregulluar formën e vetullave përdorni vetëm laps vetullash dhe jo të njëjtin laps që përdorni për sytë. Përdorni dy ngjyra hijëzuese për kapakët e syve. Një të qartë për zonën poshtë vetullave dhe një tjetër më të errët për zonën e kapakëve të lëvizshëm, për t’i dhënë më shumë ndriçim shikimit. Lapsin vijëzues përdoreni para toneve, për të mos lënë viza të çrregullta. Nëse mbani syze, përdorni një laps ngjyrë kanelle.

Koha per manikyrin
Ashtu si flokët, edhe thonjtë pasqyrojnë gjendjen tonë shëndetësore. Kur jemi të lodhura ose nën stres bëhen të butë, copëtohen ose shtresëzohen. Gjëja e parë, duhen hidratuar. Ekzistojnë kremëra specifike për thonjtë, ato 2 në 1 (duar dhe thonj), që janë shumë praktike për t'u përdorur

Çfare te besh nese thonjte jane:

1.Te ngrene
Përdor një manikyr të hidhur, që u jep shije shumë të keqe thonjve
Merru vetë me lyerjen dhe rregullimin e thonjve. Kështu, duke u kujdesur vetë për ta, do të kesh një arsye më shumë për të mos i "ngrënë". Mbaj thonj fals, të cilët u lejojnë thonjve natyralë që të rriten pa u dëmtuar

2.Te brishte
Evito prerjen e tyre, sepse prerësja e thonjve i bën më të dobët. Përdor më mirë limën
Përdor një manikyr që i mban më të fortë
Mos i mbaj shumë të gjatë
Evito tretësit më bazë acetoni

3.Te verdhe
Limo sipërfaqen e thonjve
Kur të kesh eliminuar me limë cipën e ngjyrës së verdhë, vendos një krem ushqyes
Dhe në fund vendos një shtresë mbrojtëse

7 etapa per te bere manikyrin ne shtepi
Zhyt duart në një përzierje me vaj ulliri dhe limon për të forcuar thonjtë.
Shty lehtësisht lëkurën rrëzë thoit (nuk duhet prerë kurrë)
Masazho me kujdes konturin e thonjve me një krem ushqyes me vitaminë E
Lyej thonjtë me një manikyr mbrojtës. Në këtë mënyrë manikyri tjetër do të zgjasë më shumë.
Vendos manikyrin duke mos e kursyer. Në mënyrë që thoi të marrë ngjyrë të njëjtë me atë të manikyrit, furça duhet të jetë e bollshme me manikyr dhe të kalojë vetëm dy herë mbi thua, pa lënë viza, por një sipërfaqe të lëmuar.
Nëse preferon thonj natyralë, zbardh ekstremitetet e thoit me një laps të bardhë dhe më pas lyeji me manikyr të tejdukshëm.
Mund t'i zbukurosh thonjtë edhe me minibizhuteri, gurë, pirsing dhe lloje të ndryshme dekorimesh.

ABC-ja e tendencave 2006

Çfarë ka rezervuar ky fillim viti? Nuk e kemi fjalën aspak për parashikimet e yjeve, por për atë që do të përbëjë tendencë në modë, stil, kulturë dhe shije, gjatë muajve në vazhdim të 2006-ës

a. Aksesorë
Janë esencialë për një look perfekt. Nuk mjafton vetëm një komplet i kombinuar, duhen të gjitha, këpucët e duhura, rripi dhe pa harruar më kryesoren, çantën.

b. Bizhu
Nga më të rëndat dhe më të ngarkuarat. S'ka nevojë të jenë të çmuara. E rëndësishme është të mos mungojnë për asnjë arsye në veshjen tuaj.

Ç. Çizme
Janë rikthyer dhe do të qëndrojnë tendencë për gjatë gjithë vitit. Sidomos në stilin kalorsiak, me pantallona të futura brenda, që i bëjnë edhe këmbët më pak të bukura të duken shumë seksi.

d. Dyzet
Janë vitet e rilindjes. Falë kirurgjisë plastike dhe fitnesit, edhe pse 40 vjeç, pamja mund të jetë spektakolare për të zilepsur edhe një njëzetvjeçare.

e. Ekstravagancë
Shtoni sa më shumë të jetë e mundur dozat e ekstravagancës në veshjen tuaj. Asgjë nuk duket e tepruar këtë vit. Mjafton të guxosh në veshje dhe stil.

f. Femërore
Eshtë fjala kyç për modën e 2006-ës. Në koleksionet e stilistëve të mëdhenj gjejmë gjithmonë e më shumë mbështetje në femërore. Gjithmonë e më shumë veshje ultrafemërore dhe romantike.

g. Gëzof
Eshtë materiali më i përdorshëm gjatë ditëve të ftohta dhe jo vetëm. Në të gjitha veshjet përdorni materiale gëzofi, në jaka, mëngë, çanta, por sidomos tendenca më e re janë çizmet me dekorime gëzofi.

gj. E gjelbër
Sa vjen e më shumë po bëhet ngjyra më e përdorshme në veshje. Por edhe në makiazh. Tonalitetet e së gjelbrës duket se do të shoqërojnë sfilatat edhe gjatë muajve të pranverës.

h. Hekur
Po mbizotëron gjithnjë e më shumë në të gjitha llojet e bizhuve. Pa harruar këtu edhe format e larmishme të preçinave në xhinset e grisura dhe pjesët metalike të vendosura nëpër çanta.

i. Internet
Femrat kanë filluar t'ia kalojnë seksit të fortë në rrjet, sidomos për sa u përket blerjeve online. Dhe blerjet më të spikatura janë libra, muzikë dhe veshje firmato, që të blera në rrjet fitohen me ulje të mëdha çmimesh.

j. Jelek
Të jep pamjen e luftëtares, sepse në të gjitha vitrinat do t'i gjeni të sajuar me copa gëzofësh dhe lëkurash, madje edhe me zinxhira të varura gjithandej. Janë më në modë se kurrë.

k. Kaçurrela
Kthehen edhe një herë. Tendenca e flokëve kaçurrelë është më modernia. Edhe ato të bëra dikur me bigutina të mëdha për t'u dhënë flokëve onde, të cilat i shtojnë pamjes shumë fiminilitet.

l. Look i shtrenjtë
Veshje, aksesorë, këpucë, krehje. Dyqane të modës së lartë. Gjithçka këtë vit duket se paguhet shumë shtrenjtë.

m. Martesa
Të gjithë po presin martesën mes çiftit më të famshëm, Anzhelina Zholi dhe Bred Pit. Disa herë e anonçuar, por asnjëherë e përfunduar në altar. Ndërkaq, ai po adopton fëmijët e saj. Për më shumë… duhet të presim.

n. Ngjyra
Janë të gjitha në modë. Nuk ka kufij. Madje nuk ka nevojë as për kombinim. Mund të vishni pallto me ngjyrë, këpucë me ngjyrë. Por tendenca më e re duket se janë çorapet dhe getat. Të gjitha modelet, por edhe të gjitha ngjyrat.

o. Orient
Jo vetëm sepse është më ekonomik, por sepse gjithçka po drejtohet nga orientit. Jo më si kryeqytetet e turizmit dhe stilit si Nju-Jork, Los Anxhelos, por si Bangkok, Shangai, Seul dhe Tokio.

p. Punë me dorë
Ose më mirë një çlodhje shumë e mirë pas një dite me stres. Të qetëson sikur ke bërë një seancë joge. Është pasioni që po ngërthen gjithnjë e më shumë edhe yjet e Hollivudit, që nga Xhulia Roberts, Kameron Diaz, Uinona Raider… të gjitha po i punojnë veshjet e tyre me dorë.

r. I ri
Për muajt e parë të vitit propozohet gjithmonë një look i ri. Mos kini frikë të ndryshoni pamjen tuaj me tendencat më treny të modës.

s. Sport
Duket se palestrat janë kthyer në modë. Për të hequr kilet e tepërta, por edhe për të mbajtur trupin në formë.

sh. Shtëpiake të dëshpëruara
Absolutisht jo. Pas viteve të tëra karriere të shfrenuar, femrat duan të bëjnë një pushim, duke iu përkushtuar shtëpisë. Tashmë kanë më shumë kohë për veten pas gjendjes së stabilizuar ekonomike që kanë arritur.

t. Telefona dhe TV
Do të jetë viti i ndeshjeve të para drejtpërdrejt në TV. Por teknologjia e re mundëson që në telefona të shihet edhe një film i tërë nëpërmjet një mikromonitori telefonik.

u. E ulët
Takat e ulëta, të rikthyera gjatë vitit 2005, vazhdojnë të përbëjnë tendencë. Këpucë të ulëta, sandale, çizme. Kush nuk i duron dot takat e larta, do të ketë shumë mundësi zgjedhjeje.

v. Vezullues
Do të vazhdojnë edhe për këtë vit të jenë në modë teminat dhe gurët vezullues. Në të gjitha llojet e veshjeve, duke lënë mënjanë aksesorët, pjesët e shndritshme e bëjnë look-un më tërheqës dhe më trendy.

xh. Xhins
Rikthehen vitet '80-të me xhinse të grisura, me qëndisma dhe zbukurime, ose thjesht xhinse. Janë mbretëreshat e modës, për të gjitha momentet edhe për të gjitha ambientet.

v. Vakancë
Fjala që mban vendin e nderit. Të shijosh ditët e pushimeve. Jo vetëm pushimet e gushtit. Më mirë të shfrytëzosh të gjitha minipushimet gjatë vitit.

z. Zeta Xhons
Katerin Zeta Xhons ka sjellë një propozim për këtë vit: lini duhanin. Ua ka premtuar dy fëmijëve të saj 5 dhe 2 vjeç, sepse ka frikë të jetë një shembull i keq për ta.