Shijoni darkën e Vitit të Ri pa njenja faji dhe kile tshumta

Tradita e do që ndërrimi i viteve të shoqërohet me një tryezë të pasur dhe të larmishme ushqimesh, ëmbëlsirash dhe pijesh. Dhe në fakt, as ne shqiptarët nuk mund ta konceptojmë ndryshe...

Shumë prej nesh iu tremben ditëve të festës së Vitit të Ri, pasi konsumi i rritur i ushqimit dhe ëmbëlsirave do na lërë kusur dhe kile të tepërta. Dhe në të vërtetë ky është një fakt, por jo i pashmangshëm. Që tryeza e Vitit të Ri të realizohet me sukses, duhet të bëjmë zgjedhje të zgjuara të pjatave që do shërbejmë apo që do konsumojmë, në mënyre që ta shijojmë darkën e Vitit të Ri dhe ditëve që do pasojnë, pa shkatërruar siluetën apo dëmtuar shëndetin tonë.

Nëse do numëronim kaloritë e tepërta që mund të merren nga një tavolinë e Vitit të Ri, ato mund të arrijnë dhe 6000 kcal, duke kontribuar kështu në shtim në peshë afërsisht 1 kg! Kjo sasi kalorish është pothuajse trefishi i atyre që duhet të marrim çdo ditë. Nëse kjo ndodh për disa ditë me radhë, duke respektuar dhe ftesa të ndryshme nga të afërmit për dreka dhe darka, imagjinoni se ç’mund të ndodhë me peshën tonë vetëm në pak ditë. Por nuk është vetëm pesha ajo që rrezikon, le mos të neglizhojmë pasojat që mund të kenë personat me diabet, me hipertension apo me probleme të zemrës. Këshillat e mëposhtme do t’ju ndihmojnë t’i evitoni deri në një farë mase këto fenomene.

Zgjedhja e pjatave Pjata kryesore: Pjata jonë tradicionale “Pule deti me dollma”, mund të bëhet një pjatë më se e shëndetshme, nëse konsumoni sasinë që dëshironi nga mishi, mjafton të jetë pa lëkurë, pa dhjamin e dukshëm dhe mundësisht mish i bardhë; dhe nga dollma të mos hani më shumë se 1 pjatë. Përdorni erëza si dhe hudhër e sa më pak kripë. Sallatat: Sallata ruse përmban në vetvete ushqime të mrekullueshme si fasule, bizele, karota dhe patate, por kujdes me majonezën. Mundohuni që majonezën ta përgatisni vetë me vaj ulliri, vezë dhe limon dhe kursehuni pak në përdorimin e saj. Pasuroheni tavolinën me zarzavate të larmishme për sallata të ndryshme dhe përdorni uthull balsamike ose limon dhe kursehuni me vajin e ullirit. Evitoni përdorimin e kremit të qumështit (pana) sepse është shumë i yndyrshëm. Në vend të tij mund të përdorni kosin, për salcë për sallata të ndryshme.

Djathi që do shoqërojë zarzavatet të jetë mundësisht rikota, djathë dhie, gjizë pa kripe ose parmixhano. Nëse do gatuani byrek, mund të bëhet i mrekullueshëm edhe nëse përdorni fare pak vaj ulliri dhe lakra të egra ose spinaq, djathë pa yndyrë, qumësht pa yndyrë dhe nëse e preferoni me vezë, përdorni një vezë bashkë me të verdhën dhe nga të tjerat vetëm të bardhën. Kështu do kurseni rreth 100 kalori për racion dhe gjithashtu nuk do ketë asnjë efekt negativ për yndyrat në gjak. Nëse ju pëlqen salca e kosit, mund ta përgatisni vetë nga kos me yndyrë të reduktuar dhe duke i shtuar pak vaj ulliri, hudhër, kastravec dhe koper dhe ta servirni të shoqëruar me zarzavate të freskëta, si speca të freskët të të gjitha ngjyrave, kastravecë, brokoli dhe pak avocado në mes, të prerë në feta të holla.

Ëmbëlsirat Kadaifi dhe bakllavaja janë ëmbëlsira, të cilat në 100 gr kanë rreth 500 kalori! Janë ato që kur konsumohen menjëherë pas ushqimit, kanë efekt depozitues të kalorive në dhjam. Këtu duhet të keni kujdes: së pari mundohuni t’i përgatisni vetë, duke u kursyer sa më shumë me gjalpin dhe sheqerin, dhe për këtë të fundit mundohuni të përdorni një kombinim sheqeri kaf me ëmbëlsues artificial. 1 lugë e madhe sheqer ka 50 kalori, kurse 1 lugë gjalpë ka 140! Llogaritë i bëni vetë…

Përveç dy ëmbëlsirave që përmendëm më lart, një zgjidhje tjetër është dhe strudeli i mbushur me arra. Është një ëmbëlsirë shumë e shijshme dhe më e shëndetshme. Gjithsesi do ishte paradoks të pretendonim që në këto ditë festive të mos konsumojmë bakllava dhe kadaif, por zgjidhja është te sasia që marrim dhe sa shpesh. Nëse kontrollojmë sasinë dhe shpeshtësinë, çdo gjë është në rregull.

Për ata që kanë diabet, këshillohet të konsumojnë ëmbëlsirat me sheqer artificial dhe një ëmbëlsirë që kanë dëshire ta konsumojnë, ta ndajnë në 2-3 pjesë dhe ta konsumojnë çdo 2-3orë. Alkooli Një nga armiqtë kryesorë të vetëkontrollit! Nuk ka lezet nata e Vitit të Ri pa bërë gëzuar mbi 10 herë. Por nuk ka lezet dhe dita e nesërme me dhimbjen e tmerrshme të kokës dhe lodhjen e padurueshme. Këshillat në këtë rast janë: zgjidhni pije të cilësisë më të mirë, preferoni verë të kuqe ose të bardhë, shoqëroheni gjatë gjithë kohës me ujë ose hollojeni gotën me ujë të gazuar. Verërat që hapen duhet të konsumohen brenda 2-3 ditëve.

Edhe birra është një zgjidhje, por shpesh provokon fryrje të stomakut dhe gazra. Nëse do konsumoni pije të distiluara, mos harroni që për çdo teke të pini një gotë ujë. Kujdes: Personat që vuajnë nga diabeti, nuk duhet të bëjnë gabimin të kompensojnë ushqimin me alkool, pasi ky i dyti shkakton ulje të sheqerit në gjak dhe mund të kalojnë në hipoglicemi. Pijet e tjera Në tryezën tuaj duhet të mbizotërojë uji natyral ose dhe i gazuar. Evitoni pijet e gazuara si cola etj, pasi përveç kalorive boshe dhe një numër të konsiderueshëm konservantesh, nuk ju ofrojnë asgjë të dobishme. Si të veproni shëndetshëm

1. Është gabim të rrini gjithë ditën pa ngrënë, me idenë se do hani në darkë. Kjo mund t’ju çojë fare lehtë në mbikonsum!

2. Fillojeni të ngrënin nga sallatat me zarzavate të freskëta dhe pastaj kaloni te pjata kryesore.

3. Hani ngadalë.

4. Përdorni buke të zezë, por jo më shumë se 2 feta të vogla.

5. Pini ujë natyral gjatë darkës (njësoj është dhe uji me gaz)

6. Ëmbëlsirat mos i hani menjëherë pas buke dhe mundohuni t’i ndani në copa të vogla gjatë ditës.

7. Për ata që vuajnë nga hipertensioni, të kenë kujdes konsumin e kripës dhe të kafeve.

8. Dilni dhe ecni sa më shumë në këmbë për të bërë blerjet, përgatitjet, vizitat te kushërinjtë dhe miqtë etj.

9. Dhe mos harroni, darkat festive shtrohen për t’u mbledhur me njerëzit e dashur, për të biseduar dhe argëtuar, prandaj kushtojini më shumë kohë “muhabetit” dhe shoqërojeni atë me ushqim të zgjedhur dhe verë të mirë ……. pa e tepruar! Gëzuar Vitin e Ri!