Klito Fundo

Klito Fundo u lind në Korçë në vitin 1938. Ka studiuar për Gjuhë dhe Letërsi Shqipe në Universitetin e Tiranës. Paçka se ka shkruar poezi e prozë qysh në rininë e hershme të tij, pra që në moshën pesëmbëdhjetëvjeçare, si nipi i Zoi Fundos, që u pushkatua nga regjimi enverhoxhian, nuk iu lejua publikimi i asnjë libri. Vetëm në vitin 1998 arrin të botojë në Korçë vëllimin Poezi erotike.


LE TË HESHTIM...

Lamtumirë, mike, lamtumirë,

Midis nesh tani nuk ka asgjë.

Ato netë që bashkë i kemi gdhirë,

Le të heshtin si filmat pa zë.



Le të heshtin orët erotike,

Shtrirë mbi një shtrat të çrregulluar,

Mes rrënkimesh, afshesh e dënesash,

Ndër çarçafë çmendurisht të ngatërruar.



Ti aty e flake virgjërinë,

Lodrën fëminore, që të mbeti.

Një njollë loti dhe tjetra ngjyrë vishnjë

Vajzërinë e brishtë përshëndeti.



Ti e di sa bukur ne kaluam,

Ti e di që duheshim aq fort,

Por takimet kanë edhe ndarje,

Buzëqeshjet kthehen shpesh në lot.

SEKS

Sapo të pashë ty u mrekullova,

E zhveshur krejt m'i ndeze zjarr dëshirat.

Kam bredhur shpesh në nudot femërore,

Sonte ti je m'e mira ndër të mirat.