Petrit Ruka

Ka lindur në Tepelenë më 21 Gusht 1954. Studimet e larta për Gjuhë Letërsi Shqipe dhe studimet pas-unuversitare pёr dramaturgji filmike,i ka kryer në Akademinë e Arteve të Bukura, Tiranё nga viti 1985 deri më 1986.
Autori ka punuar si pedagog nё Shkollёn e Mesme tё Pёrgjthshme, Tepelenё nga viti 1976 deri më 1984. Gjithashtu ka punuar si skenarist dhe regjisor në Kinostudion “Shqipёria e Re” dhe Alba Film Studio në Tiranё që prej 1986 deri më 1996. Në vitin 2000 ka punuar si drejtor nё Teatrin Kombëtar të Fëmijëve, Tiranё . Dhe nga viti 2000 deri më 2005 ka punuar si Kryetar i Qëndrës Kombëtare Kinematografike Shqiptare.


Këngë për Gruan

-Zh-

Grua ma ke nxirë jetën dhe jetën ta kam nxirë,
Jemi sharë në dritë dhe jemi puthur në errësirë,
Kemi vendosur të ndahemi dhe kemi thënë; e po mirë!
Dhe prapë jemi puthur ashtu si për lamtumirë.

Kemi gënjyer njeri-tjetrin, kemi bërtitur s'të dua,
Kemi pështyrë mbi proverbin që qënkeshim mish e thua,
Kemi mburrur kontratat që bëjnë në Amerikë.
Kemi thënë njëmijë herë; u mbush kupa dhe pikë.

Pastaj jemi përqafuar ; “e po unë isha në gjumë “
Jam futur në mishin tënd siç futet në shkretëtirë një lumë,
Jemi sëmurur dhe fshehurazi i jemi lutur qiellit,
Na është holluar shpirti nga frika si fija e perit.

Dhe prapë jemi zënë sa janë tundur tepsitë,
Kemi ndarë dyshekun me vijë, (ah, vijë e florinjtë,)
Po në errësirë kufirin e kemi shkelur si barbarë
Me dredhi ballkanike që as O.K.B-ëja s'ka parë.

Grua, ma ke nxirë jetën dhe jetën ta kam nxirë,
Ma ke pirë gjithë vrerin dhe helmin ta kam pirë,
Po ja që s'bëjmë dot pa këtë helm të mallkuar
Mos pushofsh kurrë, moj luftë dhe qofsh e bekuar!