Çiljeta Xhilaga, kenge per 14 shkurtin dhe album te ri

Të dashuruarit do të kenë një motiv më shumë për të festuar! Më tepër se një darkë romantike nën dritën e qirinjve, të rinjtë mund të zgjedhin edhe hitin që do t’u kushtohet pikërisht atyre.
Këngëtarja e njohur Çiljeta Xhilaga ka zgjedhur që të publikojë një këngë dedikuar dashurisë, duke dhënë kështu një motiv më tepër për t’u festuar 14 shkurtin e këtij viti. “Kam nisur punën për të realizuar një hit të ri, që do të jetë në stilin e baladës e që do publikohet në ditën e të dashuruarve. Gjithnjë më kanë tërhequr baladat dhe kompozitori Florian Mumajesi me të cilin po bashkëpunoj momentalisht, ka zgjedhur diçka tejet të veçantë, që i shkon më për shtat timbrit tim. Po në 14 shkurt, krahas këngës së re do të nxjerr në tregun muzikor edhe albumin tim më të fundit, që do të përmbajë rreth 10 hite të reja, të padëgjuara më parë”, thotë për “Korrierin” Çiljeta. Pas klipit më të fundit “Falma”, që ka pak ditë që është prezantuar nëpër stacionet televizive muzikore, si dhe bashkëpunimit me miken e saj, Ingridin, “Puçi, puçi”, këngëtarja ka nisur përgatitjet vrullshëm për të pasur gati baladën në datën 14 shkurt.
Ajo pohon se kjo gjetje nuk ka lidhje me të dashurin e saj dhe ndjenjën që ata të dy ndajnë për njëri-tjetrin. Është një hit më tepër masiv, sesa personal, sepse për Romeon dhe Çiljetën ka dashuri në çdo ditë të vitit, e jo vetëm në një të vetme. Në gjithë këtë intensitet ka menduar edhe pak për veten e të dashurin e saj. “Kam vetëm pak ditë që jam kthyer nga pushimet. Pas koncerteve në Zvicër, munda të isha në shtëpi më datë 31 dhjetor e deri në orën 12 të mesnatës festova me familjen. Më pas u nisa direkt me Romeon për në Kosovë. Atje isha e ftuar në disa koncerte, ndërsa përfitova nga rasti edhe për të festuar e pushuar njëkohësisht në disa qytete të Kosovës. Kemi kaluar disa ditë të paharrueshme, por tani kur mendoj që duhet t’i kthehem punës, mërzitem”, thotë ajo. Bashkëpunimi i fundit me modelin shqiptar në Australi, Afrim Aliaj, ishte një eksperiencë krejt e veçantë për të. Ishte e vetmja këngëtare që mundi të realizojë një këngë me një djalosh shqiptar tepër të njohur në kontinentin australian, që numëron disa kontrata milionere me kompani të njohura në shtetin ku tropojani jeton prej 10 vitesh.E kjo për Çilin nuk ishte pak! Më tepër se një lutje për të falur tradhtinë që ajo i ka bërë të dashurit (sipas tekstit të këngës), sytë e shumë femrave janë ngulitur më tepër tek modeli i njohur. Sa i takon xhelozisë, ky nocion nuk ka vend në lidhjen disavjeçare të saj me Romeon, djalin me të cilin po përjeton një lidhje dashurore për t’u admiruar. Ata të dy gjejnë gjithmonë kohë për njëri-tjetrin, por ky vit ka qenë vërtet i ngjeshur për këngëtaren. Ndaj mendoi që për festat e fundvitit, disa ditë pushime larg Tiranës do t’u bënin vërtet mirë. Këngëtarja nuk preferon që ta përqendrojë vëmendjen te klipi “Falma”, që deri më tani sipas saj, ka rezultuar goxha i suksesshëm. Sepse ende pa u zbehur hovi i klipit të fundit, një tjetër hit do të vijë për 14 shkurtin, si një dhuratë që ajo ka menduar për të gjithë fansat kudo ndodhen.