Çka studiojnë disa prej këngëtarëve kosovarë?

Për dallim prej aktorëve që shumë prej tyre duhet të regjistrohen në Fakultetin e Arteve, dega e aktrimit, për të hyrë në botën e kinematografisë, këngëtarët kosovarë mund të mos kenë të kryer asnjë shkollë të muzikës për të hyrë në industrinë e muzikës. Disa prej këngëtarëve janë muzikantë të diplomuar, ndërsa disa janë ende duke studiuar në Fakultetin e Arteve, dega e muzikës. Por, shumë prej këngëtarëve tashmë merren me muzikë dhe kanë vendosur të studiojnë diçka krejtësisht tjetër në Universitetin e Prishtinës apo në fakultete private. Pra, çfarë kanë zgjedhur këngëtarët të studiojnë? Muzikën, biznesin, juridikun apo edhe të tjera lëmi? Apo nuk kanë vazhduar studimet fare pas shkollimit të obliguar. Adelina Thaçi - Adelina Thaçi tashmë ka mbaruar studimet. Ajo ka diplomuar në Akademinë e Muzikës, dega e solo-këndimit. Këngëtarja thotë të jetë duke menduar për t’u regjistruar në magjistraturë. Përmes telefonit, këngëtarja i ka deklaruar emisionit tonë se është duke shikuar mundësinë që magjistraturën ta regjistrojë në Shkup. Ajo ka thënë studimet në lëmin e muzikës klasike i kanë ndihmuar shumë edhe në muzikën zbavitëse dhe në pjekurin saj si një këngëtare profesioniste.

Rona Nishliu - Ndryshe nga Thaçi, këngëtarja Rona Nishliu ka zgjedhur diç tjetër për të studiuar. Ajo është në vitin e katërt në Universitetin Amerikan të Kosovës, dega administrimi i biznesit. Nishliu pret që gjatë muajit maj të diplomojë dhe më pas t’i përkushtohet më intensivisht muzikës, përkatësisht lansimit të albumit të saj në treg. Përveç si këngëtare, ajo në të ardhmen veten e sheh si një menaxhere të mediave dhe shou-biznesit.

Poqi – Rokeri kosovar B.B.Poqi kishte vendosur për të studiuar mjekësinë. Ai kishte nisur studimet në Fakultetin e Mjekësisë, por pas vitit të katërt për shkak të angazhimeve muzikore i kishte ndërprerë ato. Poqi asnjëherë nuk ka punuar në këtë profesion, ndërsa ka deklaruar se nuk ka ndërmend të vazhdojë sërish studimet, ngase ka kaluar një kohë e gjatë që nga ndërprerja e tyre dhe siç u shpreh ai, “koha e bënë të veten”.

Teuta Kurti – Që nga fëmijëria është marrë me muzikë dhe tani studion në këtë drejtim. Është kjo këngëtarja Teuta Kurti, e cila aktualisht është në vitin e tretë në Fakultetin e muzikës. Sikurse Thaçi, edhe këngëtarja Kurti ka thënë se studimet i kanë ndihmuar shumë në pjekurinë e saj si një këngëtareje profesioniste. Madje kjo sipas saj i ka ndihmuar shumë veçmas në zhvillimin e zërit.

Diellza Kolgeci - E njohur si manekine, aktore, këngëtare dhe herë- herë si disenjatore e modës, Diellza Kolgeci ka mbaruar studimet për dizajn në Nju Jork. Por, nuk e ka lënë me kaq. Ambicia që në të ardhmen të bëhet një avokate e zonja e ka shtyrë atë që të regjistrohet në Fakultetin Juridik. Tashmë ajo është në përfundim të këtij fakulteti. Në këtë drejtim, ajo ka deklaruar se shumë shpejt do të jetë një avokate. Sikur dizajni, ashtu edhe juridiku Kolgeci ka thënë t’i kenë ndihmuar në aspekte të ndryshme.

Vesa Luma – Këngëtarja Vesa Luma për studime ka zgjedhur komunikimin masiv. Luma ka thënë se i kanë mbetur vetëm edhe disa provime për të diplomuar në këtë lëmi. Vesa ka thënë të ketë gjetur një lidhje ndërmjet këtyre dy profesioneve dhe, sipas saj, komunikimi masiv i ka ndihmuar asaj në muzikë dhe anasjelltas. Këngëtarja ka bërë të ditur se tashmë ka menduar edhe për magjistraturë. Do të jenë pikërisht marrëdhëniet diplomatike, ku ajo ka vendosur të magjistrojë. Lidhur me këtë Vesa nuk ka mohuar faktin se në të ardhmen do të mund ta shohim atë të angazhuar edhe në politikë.

Jehona Sopi – Pop këngëtarja Jehona Sopi ka përfunduar shkollën e mesme të muzikës dhe aktualisht është në vitin e dytë duke studiuar psikologjinë.

Genc Prelvukaj – Reper, por në të ardhmen politikan dhe historian. Është ky Genc Prelvukaj, i cili në të njëjtën kohë ndjek studimet në dy drejtime. Është në vitin e dytë në Shkenca Politike në njërin nga Universitet private dhe në Histori në Universitetin e Prishtinës. Ndërsa, më parë Prelvukaj kishte ndërprerë studimet në vitin e dytë në gjuhë dhe letërsi. Edhe Prelvukaj e ka lënë të hapur mundësinë se pas përfundimit të studimeve të kyçet në politikë.

Edona Llalloshi – Këngëtarja Edona Llalloshi fillimisht shkollën e ultë dhe të mesme të muzikës e ka përfunduar në shkollën e muzikës “Prenk Jakova” dhe më pas ishte studente në Akademinë e Muzikës. Sikur edhe shumica e kolegëve të saj, Llalloshi ka vendosur që të vazhdojë studimet në njërin nga universitet private. Ajo këtë vit ka regjistruar ekonomikun, përkatësisht menaxhmentin dhe ka deklaruar se studimet janë duke i shkuar mirë. Jo rastësisht ka thënë ta ketë zgjedhur këtë profesion, ngase edhe muzika sipas Llalloshit kërkon menaxhim të mirë.

Teuta Selimi – Ndryshe nga të lartpërmendurit, këngëtarja Teuta Selimi përveç shkollimit obligativ nuk ka vazhduar studimet. Madje ka deklaruar se nuk e ka ndërmend që edhe në të ardhmen të merret me studime, kjo për shkak të obligimeve të shumta në muzikë