Kaltrina Selimi:Album krejtësisht më ndryshe!

Këngëtarja Kaltrina Selimi rreth realizimit të albumit të saj të ri, ka preferenca krejtësisht të ndryshme nga këngëtarë të tjerë. “Dua të shkoj me këtë version: një këngë, një videoklip. Ngase, unë me një këngë të re, mund ta sjell në dritë albumin e ri, e nuk është e domosdoshme që albumi i ri të jetë me të gjitha këngët e reja”, shprehet ajo

Këngëtarja nga Prishtina, Kaltrina Selimi, e cila ka katër vite që tashmë është shndërruar në një yll të muzikës sonë, këto ditë ka pushtuar ekranet tona me klipin e këngës së saj “Autostop”, një këngë e realizuar në Shqipëri, nga Flori.
“Autor komplet i kësaj kënge është Flori, si kompozitor, tekstshkrues…Pra, këngën e kam realizuar në Shqipëri”, sqaron Kaltrina. Sipas saj, realizimi i kësaj këngë nuk i ka kushtuar shumë nga xhepi i saj, sa i ka kushtuar nga përpjekja për të koordinuar kohën bashkërisht me Florin.

Mst: Kënga pas ‘tollovisë’

“Nuk më ka kushtuar shumë, porse ka qenë koha paksa e vështirë dhe na është dashur që të përcaktojmë minutat kur unë dhe Flori të kemi kohë të lirë, për ta realizuar këtë këngë. Mirëpo, rruga ka qenë tejet e lodhshme…jo tjerat”, thotë ajo.
Edhe pse kënga “Autostop” ka qenë e përgatitur shumë kohë më herët, Kaltrina këtë klip dhe këngë e ka shtyrë për muajt pas vitit të ri, me qëllim që kënga e saj të editohet pas ‘tollovisë’ së programeve festive.
Ndërkaq, planet tjera të Kaltrinës mbeten për muajt e verës. “Natyrisht, se gjatë sezonës së verës kam plane të shumta, rreth mbrëmjeve muzikore që do t’i mbaj nëpër vende bregdetare, si në Ulqin, Shqipëri, por kuptohet gjithsesi edhe nëpër Kosovë”.
Ndryshe, sa i përket realizimit të ndonjë klipi tjetër të ri, kjo gjë, sipas Selimit, do të varet nga suksesi i këngës së fundit. “Nëse e shoh se pak po bie interesimi për ta dëgjuar këtë këngë, atëherë do të përpiqem që të sjell diçka të re, më ndryshe. E nëse dëgjohet, atëherë do t’i lë adhuruesit e mi të dëfrehen me këtë këngë”, thekson Selimi.

Mst: Albumi për adhuruesit!

Ajo këngën edhe klipin e fundit e cilëson si të suksesshëm pasi që informatat nuk i kanë munguar. “Kam informata se kënga është goxha e dëgjuar, sepse ka qenë nëpër top lista, dhe për këtë më kanë marrë në telefon…”.
Porse, si duket ndonjë album të ri nga Kaltrina Selimi nuk do ta kenë rastin ta kenë në duar shumë shpejt adhuruesit e saj, sepse preferenca e saj është krejtësisht ndryshe nga e këngëtarëve tjerë. “Dua të shkoj me këtë version: një këngë, një videoklip. E kur t’i kompletoj tetë apo nëntë këngë, atëherë do t’i fus në një CD bashkërisht, në mënyrë që fansat e mi t’i kenë të gjitha këngët e mia në atë album”, shprehet Selimi duke potencuar faktin se ajo preferon që përmbledhja e këngëve të jetë në këtë mënyrë e jo në mënyrën se si e realizojnë të gjithë këngëtarët. “Unë më një këngë të re, mund ta sjellë në dritë albumin e ri, e nuk është e domosdoshme që albumi i ri të jetë me të gjitha këngët e reja”.
Përndryshe, Kaltrina Selimi posedon gjithsejtë gjashtë këngë të saja të realizuara, të cilat kanë bërë ‘boom’ nëpër televizionet tona. Ndërkaq, mbetet të shihet nëse pas tri këngëve të reja që do t’i realizojë ajo në të ardhmen, do ta lansojë albumin e parë nëpër tregjet tona. Kaltrina po ashtu është absolventë në Akademinë e Arteve të Bukura, në Prishtinë, në degën e muzikës. Dhe, gjer në përfundim të fakultetit i kanë mbetur edhe gjashtë provime.