Adelina: Plumbi që nuk vret të bën më të fortë

Adelina Ismajli është rikthyer në skenë me videoklipin e këngës "Trimit tim", të cilën ia ka kushtuar ish-të dashurit të saj të ndjerë, Triumf Riza. "Jam munduar, por nuk kam arritur ta përshkruajë krejt çka kam ndjerë", ka thënë së fundi këngëtarja.
Në një intervistë për emisionin e KTV-së, “Përrallë me tupan”, Adelina Ismajli ka treguar arsyet se pse videoklipi i fundi i saj është realizuar jashtë Kosove. Ajo ka thënë: “Ka qenë frika që elementet të caktuara, kanë mundur të më pengojnë në realizimin e një kënge në Kosovë. Kam tentuar në Turqi, por ka qenë ekstremisht shtrenjtë dhe vështirë për ta përshtatur mentalitetin kosovar”.
Rreth temës së trajtuar në këtë këngë, ish-missi i Kosovës ka thënë se kjo nuk i kushtohet vetëm ish-të dashurit të saj, por shumë djemve të cilën kanë përfunduar në një mënyrë të tillë. “Jam munduar të përfshijë gjithçka; nuk është këngë që e përfshinë vetëm një person, sepse ka keq e më keq. Kemi përjetuar lufta të ndryshme...”, ka thënë këngëtarja e rikthyer, duke shtuar: “Plumbi që nuk vret të bën më të fortë”.



“E di që ka keq e më keq dhe shumë sigurt e di se historikisht, nëse jo të parën apo të dytën gjeneratë, atëherë të shtatën... çdo familje ka nga një mashkull të humbur. S’ka asnjë familje që ka së paku një mashkull e që se din çka është dhimbja”, është shprehur Adelina e mbushur në emocione.
“Mjekët më kanë sugjeruar të punoj”
Në një intervistë tjetër të dhënë për emisionin Top RTK ndërkaq, Adelina ka zbuluar se rikthimi i saj ka qenë me shkas. Në fakt mjekët kanë qenë ata që i kanë preferuar asaj të jetë e angazhuar.
“Është realitet dhe pse mos ta theksoj. Ka qenë një sugjerim i mjekëve që të punoj sa më shumë”, ka theksuar Adelina.
“Çdo vit i kam thanë vetes se ky është fundi. Gjithmonë kam qenë e vendosur që në një moment ta ndërpres karrierën në këndim dhe të kaloj në një profesion tjetër. Mirëpo, ka qenë vetë muzika që nuk më ka lënë mua të largohem”, ka thënë ajo.