Shpërthim në një depo municioni në Gërdec

Një shpërthim ka ndodhur të shtunën në fshatin Gërdec, në afërsi të Tiranës, në një depo municionesh, si pasojë e të cilit deri më tash raportohet për 4 të vdekur dhe 203 të plagosur. Më herët është raportuar për 5 të vdekur, mirëpo fatmirësisht personi i pestë ka shpëtuar. Dyshohet se numri i të vdekurve mund të jetë shumë më i madh.
Autoritetet qeveritare kanë bërë të ditur se deri më tani kanë vdekur katër persona. Sipas të njëjtave burime, mësohet se në depo, që ndodhet rreth 20 kilometra larg Tiranës, nuk ka pasur raketa por vetëm municione të llojit predhë, gjë kjo që të paktën minimizon rrezikun që mund të evoluojë më tej.
Vendet fqinje ndihmojnë Shqipërinë
Vendet fqinje të rajonit u kanë ofruar ndihmë autoriteteve të Shqipërisë në përballjen me pasojat nga shpërthimet tragjike që ndodhën në depon e municionit në Gërdec.
Kosova, Italia, Turqia dhe Maqedonia ishin ndër të parat që ofruan ndihmë. Forcat e KFOR-it në Kosovë kanë dërguar qindra qese gjaku dhe mjete ndihmëse për mbrojtjen shqiptare.
Ministria e Mbrojtjes tha se disa shtete, si Turqia dhe Maqedonia, kanë treguar gatishmëri për t'u gjendur pranë me logjistikë dhe burime njerëzore pranë ekipeve të shpëtimit.
Ambasada e Shteteve të Bashkuara në Tiranë ka shprehur shprehet gatishmërinë që personeli i ambasadës të jetë në kontakt me zyrtarë të Qeverisë shqiptare për të ofruar ndihmë.
Ndërkaq Qendra Kombëtare e Transfuzionit të Gjakut në Prishtinë u ka bërë apel të gjithë qytetarëve të Kosovës që të shkojnë për të dhuruar gjak për personat e plagosur si pasojë e shpërthimeve në depot e municionit në Gërdec të Vorës, në afërsi të Tiranës
Apeli iu bashkëngjit thirrjeve të shumta për të dhuruar gjak, të cilat gjatë tërë ditës së sotme janë bërë në shumë qytete të Shqipërisë.
Ministri i Jashtëm i Maqedonisë, Antonio Milloshoski, ka mbërritur në Tiranë, ku ka dhuruar gjak në spitalin ushtarak, dhe ka premtuar se të hënën nga Maqedonia do të dërgohen rreth 2 mijë qese me gjak.
Presidenti Sejdiu shpreh dhembjen e popullit të Kosovës për shpërthimin tragjik afër Tiranës
Presidenti i Republikës së Kosovës, Fatmir Sejdiu, ka biseduar me telefon sot pasdite me udhëheqësit e Shqipërisë, presidentin Bamir Topi dhe kryeministrin Sali Berisha, pas njoftimeve për shpërthimin në bazën ushtarake shqiptare në afërsi të Tiranës.
Presidenti Sejdiu u ka shprehur udhëheqësve shqiptarë dhembjen e popullit të Kosovës për tragjedinë që ka përjetuar sot Shqipëria. Presidenti Sejdiu ka ngushëlluar Topin dhe Berishën për viktimat e kësaj tragjedie, duke uruar që Qeveria dhe populli i Shqipërisë të gjejnë forcat për të përballuar pasojat e tragjedisë.
“Ne jemi pranë jush, pranë popullit të Shqipërisë, në këto çaste të rënda”, ka thënë presidenti Sejdiu, duke uruar që të plagosurit nga shpërthimi të shërohen sa më shpejt.
Edhe kryeministri i Republikës së Kosovës, Hashim Thaçi, të shtunën i ka dërguar një telegram ngushëllimi homologut të tij shqiptar Sali Berisha, me rastin e humbjes së jetës së disa qytetarëve shqiptarë si pasojë e shpërthimit në depon e municionit në Gërdec të Vorës.
Njësoj ka vepruar edhe kryetari i Parlamentit, Jakup Krasniqi, i cili i ka dërguar homologes së tij, Jozefina Topalli, dhe popullit shqiptar, një letër ngushëllimi.
Liderë botërorë ngushëllojnë Berishën
Ambasada e Shteteve të Bashkuara në Tiranë ka vërejtur e shokuar dhe e shqetësuar raportimet për aksidentin tragjik në depon ushtarake pranë Gërdecit. Mendimet dhe zemrat e popullit amerikan janë me ushtarët dhe të tjerët e prekur në këtë incident të tmerrshëmm thuhet në deklaratë, dhe shprehet gatishmëria që personeli i ambasadës të jetë në kontakt me zyrtarë të qeverisë shqiptare për të ofruar ndihmë.
Kryeministri Sali Berisha dhe presidenti Bamir Topi ka pasur gjithashtu mesazhe ngushëllimi dhe solidaritet nga presidenti i Francës Nicolas Sarkozy, ministri i Jashtem Bernard Kouchner dhe personalitete të tjera të Bashkimit Evropian.