Ian Paice, 12 prill koncert në “Calvin”

Pas performancës elektrizuese, plot një vit para, mars 2007, një prej anëtarëve të bandës së famshme muzikore “Deep Purple”, rikthehet në kryeqytetin shqiptar
Bëhet fjalë për kitaristin legjendar Ian Paice, i cili do të japë koncert live në datën 12 prill, në amfiteatrin “Calvin”. Paice shoqërohet nga rrokerët italianë “Matt Filippini Band”. Të ftuar do të jenë edhe grupe rroku nga Shqipëria e Kosova. Në kalendarin e Paice-it është edhe një takim në Akademinë e Arteve. Ky takim në vendin ku edukohen artistët e rinj do të jetë i pari rast nga gjithë bandat e rrokut që kanë ardhur në vite në Shqipëri, që të japin përvojën e tyre pranë një institucioni edukativ si Akademia e Arteve në Tiranë. Programi i koncertit parashikon që përgjatë 90 minutash, bateristi dhe “Matt Filippini Band” të luajnë pjesë nga repertori i “Deep Purple”. Finalja e koncertit pritet të mbyllet me një nga hitet më të fuqishme të grupit “Smoke On The Water”, e cila pa dyshim ka adhuruesit e vet tek publiku i gjerë. Interpretimi i tyre në Tiranë paraprihet nga 1 orë performancë e grupeve shqiptare e kosovare, që do të luajnë disa nga hitet e grupit të famshëm, e cila duket se do të sjellë në këtë koncert një garë interpretimesh. Organizatorë janë “Artkontakt” dhe “Charl’s Entertainment”. Koncerti do të nisë në orën 20 dhe bileta do të jetë 1 mijë lekë.