Ermal Mamaqi tërhiqet nga Portokalli për shkak të biznesit

Ermal Mamaqi, djaloshi simpatik i cili ishte pjesë e "SHBLSH", grupit më argëtues të "Portokalli"-së, nuk do të jetë më pjesë e këtij spektakli, por në një bisedë për "Panorama", ai nuk e përjashton rikthimin e tij dikur më vonë.
Ermali ka thënë se arsyeja se pse kishte vendosur të largohet, ishte sepse nuk e përballonte dot ngarkesën e madhe që kishte spektakli si dhe punën e tij private të hapur pak muaj më parë. Të investosh aq shumë për t’u bërë i famshëm dhe i suksesshëm dhe kur të arrish kulmin të largohesh, duket paksa e çuditshme, por Ermali dhe e dashura e tij, Ami, i janë përkushtuar si duket biznesit privat. Ata kanë krijuar një agjenci e cila merret me organizimin e ngjarjeve të ndryshme, dasmave, drekave dhe darkave festive, konferencave, ndejave, zbukurimeve të ambienteve, ndriçim, fustane dhe DJ. Megjithatë, derisa Ermali largohet nga “Portokalli”, Ami vazhdon të shkëlqejë edhe më tej çdo të diele, në skenën e cila edhe i njohu dhe i bëri bashkë çiftin. Në pyetjen nëse biznesi do t’ia marrë kohën dhe do t’i pamundësojë të merret me muzikë, Ermali është përgjigjur: “Jo, jo, nga muzika nuk e kam ndërmend të shkëputem. Por dua të them se edhe te ‘Portokalli’ mund të kthehem sa herë të dua, pasi aty i kam dyert e hapura”, ka thënë Ermali. Ermali ka zbuluar se surpriza e radhës do të jetë një këngë, e cila do të shoqërohet me videoklip dhe do të jetë gati gjatë verës. “Bëhet fjalë për një duet, por për momentin nuk dua të zbuloj asgjë më tepër. Ju thjesht bëhuni gati të dëgjoni një këngë shumë atraktive dhe ritmike”, shton Ermali.