Shpërthim në Harilaç - vdes një person, plagosen 3 të tjerë

Në fshatin Harilaç të Fushë Kosovës, në vendin e quajtur “te Bazenat e Ushtrisë”, afër Goleshit, të martën ka ndodhur një shpërthim, me ç’rast ka humbur jetën një 38 vjeçar dhe tre persona të tjerë janë plagosur, dy prej tyre më rëndë.
Dyshohet se shpërthimin e ka shkaktuar aktivizimi i një minë e mbetur aty që nga koha e luftës.

Ndërkaq përmes një komunikate për opinion policia ka njoftuar se personat e plagosur janë të moshës 50, 48 dhe 27 vjeç, që të tre nga fshati Nekovc i Drenasit dhe janë dërguar në QKUK për tretman mjekësor.

Menjëherë në vend të ngjarjes kanë dalë të gjitha njësitë e nevojshme për ekzaminimin e vendit të ngjarjes dhe po punojnë me intensitet të shtuar për të sqaruar të gjitha rrethanat të cilat kanë të bëjnë me këtë rast, thuhet në komunikatën e policisë.