Elvana Gjata dhe Skills, më të mirët e “Video fest”

“Video fest ‘08" ka prezantuar artistët pretendentë për pesëmbëdhjetë çmimet që do të ndahen në natën finale më 19 maj. Nominimet janë vendosur nga një juri e përbërë prej 12 personash, të cilët kanë përzgjedhur spotet më të mira prej 144 spoteve të paraqitura. Cilësia e videoklipeve shqiptare është përmirësuar nga viti në vit dhe mund te thuhet që më në fund, po ashtu si muzika dhe videot kanë arritur të jenë të një niveli bashkëkohor. Këtë vit pretendentë për “Spotin më të mirë” në “Videofest”, janë Skillz me “Ah femrat”, Elvana Gjata me “Mames”, Kaltrina Selimi me “Auto Stop” dhe Elia Zaharia me “31 October”. Më shumë nominime nga të gjithë konkurruesit, i kanë dhënë Elvana Gjatës me “Mames” dhe Skillz me “Ah femrat”, me 6 nominime.
Ata pasohen nga Kaltrina Selimi me 5 nominime për “Autospot”, ndërkohë që shumë artistë të tjerë janë nominuar në tre kategori. Çuditërisht, Adelina Ismaili, Genta Ismaili, Leonora Jakupi, Nora Istrefi, Soni etj, këngëtare me spote aq të suksesshme, janë vlerësuar shumë pak ose aspak nga juria. Për të justifikuar këtë, në faqen zyrtare të “Video fest” është vendosur dhe nje shpjegim. “Në fillim të punës së saj, juria ka vendosur që për shkak të mesazheve specifike që bartin në vete, të mos hyjnë në konkurrencë video spotet në vijim: Genta & Geti (Krejt e dinë), Grupi i këngëtarëve “Boll ka fol kuklla”, Adelina Ismaili, “Trimit tim”, Leonora Jakupi, “Të falem Kosovë”, Aurora, “Amaneti”, Eliza Hoxha, “Për ata që s’janë”. Nuk dimë se çfarë ka dashur të thotë juria me këtë, pasi shpjegimi nuk duket se ka logjikë.