Çekia, shtyn votën për Traktatin e Lisbonës

Deputetët çekë kanë vendosur sot që ta shtyjnë për në datën 17 shkurt votën për Traktatin e Lisbonës. Çekia është i vetmi vend i Bashkimit Europian që ende s’është prononcuar për Traktatin, teksti i të cilit është i destinuar të reformojë institucionet europiane. Në hapje të debatit parlamentar, kryeministri Mirek Topolanek, aktualisht President i radhës i BE-së, kërkoi shtyrjen e votës, për t’i dhënë mundësi komisioneve parlamentare të japin konkluzionet e tyre. Deputetët vendosën me 115 vota pro, 73 kundër dhe 6 abstenime të mbështetnin propozimin e kryeministrit. Votimi për Traktatin e Lisbonës ishte shtyrë edhe një herë tjetër, në muajin dhjetor.