Violinisti Papavrami ekzekuton para publikut kosovar

Titulli: Violinisti Papavrami ekzekuton para publikut kosovar 9/2/2009, 01:42

Violinisti Papavrami ekzekuton para publikut kosovar

Për gati dy orë, violinisti shqiptar Tedi Papavrami ka provuar ngrohtësinë e publikut kosovar, ndonëse jo në salla të mëdha si ato kur ai luan pjesë të muzikës klasike në Francë.Ekzekutimi me violinë i Papavramit ka hapur sezonin koncertal të vitit 2009 në Prishtinë. Ngjarja ka ardhur në regjinë e fondacionit "Argjiro", i cili organizon festivalin në Gjirokastër që bazohet në idenë e gërshetimit të muzikës popullore polifonike dhe asaj serioze me moton "muzika e dy botëve".
"Qe një moment shumë i mirë prej fillimit deri në fund. E ndjeva veten mirë, shpreha atë që doja. Pati nëj dozë improvizimi, imagjinate dhe reagimi i publikut qe shumë i ngrohtë dhe me bëhet qejfi shumë", u shpreh violinisti Tedi Papavrami.
"Është çështje e një profesionalizmi të lartë, një perfeksion në instrument, një punë e përkushtimit të madh që nuk mund të arrihet pa punë dhe ushtrime të shumta", tha ministri kosovar i Kulturës Valton Beqiri.
Në botën e artit, Papavrami njihet edhe si përkthyes në frëngjisht i veprave ë shkrimtarit të njohur shqiptar, Ismail Kadare. Ai tashmë sapo ka mbaruar përkthimin e romanit të fundit "Darka e Gabuar", botimi i të cilit në frëngjisht pritet të bëhet së shpejti. Papavrami thotë se ndjen përgjegjësi të madhe kur merr në dorë veprat e kandidatit të Nobelit për t'ia transmetuar lexuesit francez.
"Sigurisht në fillim kisha një goxha stres sepse të prekësh veprën e një shkrimtari kaq të madh është moment që është në dorën time se si do t'i transmetohet botës, sepse përveç shqiptarëve, sigurisht që të tjerët do ta lexojnë në gjuhë të tjera kështu që është gjithmnonë një përgjegjësi dhe mundohem ta bëj sa më mirë", tregon violinisti Papavrami.
I lindur në vitin 1971, Papavrami ka nisur të punojë me violionë qysh në moshën 4 vjeçare me babain e tij, Robertin. Në vitin 1982 ai përfitoi një bursë studimi nga qeveria franceze për të ndjekur mësimet te Pierre Amoyal, në Konservatoriumin e Parisit. Violina me të cilën Papavrami luan tani është bërë në vitin 2005 ekskluzivisht për të nga Christian Bayon.

» kombesia Shqiptar apo Kosovar ?
» Muzika e para.
» PARA apo DASHURI