Kaltrina Selimi: gjashtë mijë euro për një videoklip

Përveç kujdesit të madh që kanë për tekstet e këngëve, këngëtarët tanë rëndësi të madhe i kushtojnë edhe video-klipeve. Pa llogaritur gardërobën, ata shpenzojnë nga 3-6 mijë euro vetëm për video-klipe, pasi video-klipin e shohin si ndihmë drejt rrugës së sukseseve.
Një pjesë e madhe e këngëtarëve kanë investuar shuma të mëdha parash për video-klipet e këngëve të tyre, ku shumica e tyre janë bërë hite.
Një pjesë e këngëtarëve janë ndarë të kënaqur me suksesin e arritur, por ka edhe të pakënaqur.
Këngëtarja e hitit “Auto stop”, Kaltrina Selimi tha për Kosovapress se ka pasur raste kur ka investuar më shumë, por ka pasur edhe raste kur ka investuar më pak në video-klipe.
“Me qenë kënga e mirë dhe një video-klip i mirë, është një e arritur e kënaqshme, por edhe nëse kënga është e mirë dhe ka një spot mesatar, nuk është humbje e madhe”, tha ajo.
Rreth kësaj, Kaltrina bazohet në kohën kur ka qenë me grupin “Hana Band” atëherë kur video-klipet e tyre nuk kanë qenë të mira dhe nuk ka pasur investime të mëdha në to, mirëpo këngët kanë qenë të mira dhe kanë bërë që edhe videoklipi të duket mirë.
Kaltrina kohë më parë ka investuar një shumë më të madhe në një video-klip dhe nuk është ndarë e kënaqur, pasi sipas saj ka videoklipe që ka investuar më pak dhe që kanë dalë më mirë.
Këngëtarja tjetër, Adelina Thaçi tha për Kosovapress se për videoklipe me kualitet nevojitet më shumë shpenzime. Sipas saj, varet se çka kërkon dhe në bazë të saj bëhet edhe investimi, por në Kosovë për video-klipet investohet prej 3.000 euro deri në 6.000 euro.
“Faktikisht video-klipet e mia sillen aty kah mesi, mirëpo asnjëherë videoklipet e mia nuk kanë arritur shumën prej 10 mijë eurove”, tha Adelina.
Për sa i përket asaj se sa ia vlen të investohet rreth video-klipeve, Adelina thotë se në Kosovë gjithçka çka që investon “është një farë risku”, sepse kohëve të fundit video-klipi është mënyra drejt suksesit.
Njëri nga anëtarët e grupit “Etno Engjujt”, Genc Prelvukaj tha për Kosovapress se video-klipin e parë e kanë bërë në vitin 2001 dhe për atë kohë, por edhe për kohën në të cilën jemi, ka kushtuar goxha shumë.
“Meqë ka qenë video-klipi i parë, ne kemi investuar një shumë goxha të madhe prej 12 mijë markash, megjithatë tash ka teknika më profesionale sa i përket xhirimit të klipeve”, tha Genci, duke shtuar se këngëtarët në përgjithësi më shumë rëndësi i kushtojnë këngës, albumit dhe video-klipit.