Mesiç; Problemet e Ballkanit, zgjidhen duke pranuar fajet

Presidenti kroat Stipe Mesiç, vendi i të cilit, bashkë me Shqipërinë, formalizon nesër, anëtarësimin në Nato, veçon rëndësinë e këtij momenti. Në një intervistë dhënë Bbc-së, Mesiç thekson se me plotësimin e kushteve dhe standardeve të kërkuara, Kroacia e Shqipëria, kanë garantuar sigurinë, si dhe një përparim më të mirë ekonomik. Mesiç e lidh këtë, me shtimin e angazhimit në industrinë e mbrojtjes e hapjen e vendeve të reja të punës. Ndërkaq, përsa i përket Kosovës, ai vlerëson se është një realitet, të cilin Serbia duhet ta respektojë, edhe pa e njohur pavarësinë. Gjithashtu, Mesiç shprehet se e vetmja rrugë për normalizimin e marrëdhënieve në Ballkan është individualizimi i fajit, lidhur me krimet e kryera gjatë luftërave të viteve ’90, në ish-Jugosllavi.