Poezi nga Altin Galanxhi

NE

NE PIKËLLIMIN E PIJMË SI VERËN
E GOTAT I THYEJMË PASTAJ,
NA PËLQEN T'A SHTYJMË PARMENDËN
E MENDIMIT TË MBRAPSHTË PA FAJ.

E LËROJMË FUSHËN E MARRËZISË
EDHE PSE KËMBËT S'I BINDEN HAPIT TË RREGULLT
KËSHTU, I TREGOJMË NJERËZISË
SE FRIKË S'KEMI PREJ FATIT TË HEKURT.

NE PIKËLLIMIN E PIJMË ME FUND
SA, ASNJË PIKË NË GOTË TË MOS MBESË
DHE QESHIM GJERSA E QESHURA NA MUND,
ME LOTËT QË SHKËLQEJNË MBI FAQE SI VESË.
Për tek kreu

KA NGJARË

KA NGJARË TË SHKOJ UDHËS ZBATHUR
DHE KËMBËT T'I SHPOJ DËLLINJAVE TË THATA
E PËRPJETË TË JEM HEDHUR SI INDIAN I CARTUR
E T'A MBUSH KORIJEN ME THIRRMA TË GJATA.

DHE KUR GJYSHJA MË SHIHTE FYTYRPRISHUR
ME LOTIN QË KËPUTEJ SIÇ BIEN TË PJEKURA PJESHKËT,
TEK QESHTE E LIDHTE ÇEMBERIN ME LULKA QENDISUR
MË THOSH: "S'ÇALON GOMARI NGA VESHËT!"
Për tek kreu

FLAKA BLU

VETMINË SI FLAKËN BLU
RREKEM T'A SHUAJ ME FRYMË,
HEDH HAPIN NGADO KUTURU,
SI ERA MBI BARIN ME BRYMË.

UNË FLAKËN BLU S'E SHUAJ DOT
PO S'ERDHE TI TEK UNË,
E DI QË FLAKA SHPESH MERR KOT
MË KEQ SE NJË FURTUNË
Për tek kreu

GJUHA

GJITHËSEKUSH NË GOJË KA
GJUHË TË SQULLET SI MIDHJE,
VALLËZON KUR BËN SHAKA,
TËRSËLLEN KUR SHAN NË GRINDJE.

MJALTË E VRER SI I MBAN,
KJO GOJA JONË SI QYP' I ÇPUAR,
Ç'KA PËRBRENDA PËRMATANË,
KREJT I NXJERR PA PËRTUAR.

POR KA RASTE DHE QË HESHT,
GJARPËR BËHET NËNË GUVË,
S'NDIHET FARE, KREJT E QETË,
KUR MENDIMI BLUAN GURË.

RETË

ASKUSH S'MENDON PER RETË,
KUR DIELLI NGROH SI ZAKONISHT,
POR KUR NDODH T'A BËJNË QIELLIN TË SERTË
NDOKUSH I TREGON DHE ME GISHT.

SHPESHHERË ATO SË BASHKU MBLIDHEN
E FJALOSEN KOKË MË KOKË
E PËR DREQ SHPEJT NISIN E GRINDEN
E PËSHTYSIN MBI NJERËZIT NË TOKË.
Për tek kreu

TI

TI MË SJELL NË BRIGJET E QIELLIT,
SI PRANË NJË DETI
DHE UNË E DI;
TI ATY SHKRIHESH E TËRA
E BËHESH E PADUKSHME.
VEÇ UNË E DI QË TI JE PRANË MEJE
E NDJEJ SESI MA MBESHTJELL FYTYRËN
CIPA E HOLLË E FRYMËS SATE.
Për tek kreu

E LEHTË

KUR FLLADI RRUDH BUZËT MES UJIT
I LEHTË BËHET QIELLI MBI PËLLËMBËN E SHTRIRË,
E LEHTË DHE KËNGA NGA BUZËT E GURIT,
KUR VRAPIN MERR NËPËR RRËPIRË.
Për tek kreu


DO PRES

DO TË PRES NJË DITË;
DO TË PRES ME FYTYRË NGA PERËNDIMI,
SE GJITHCKA E GJELBËR, E KALTËR,
ATY MERR NGJYRËN E PUTHJES.
Për tek kreu


BUZËDET

DIELLI SHIHTE NGA NJË E ÇARË REJE
DALLGËZIMIN NERVOZ TË DETIT.

EGËRSI E TIJ NA KISH TULATUR
E NA DETYRONTE TË GJENIM MBROJTJE
NË TRUPAT E NJËRI-TJETRIT.
Për tek kreu


QARK

SHUMË HIJE NË PAK DRITË,
PAK DRITË NË SHUMË VËRTETËSI,
SHUMË VËRTETËSI NË SHUMË HIJE.
Për tek kreu


GJETHJA

GJETHJA -
PËLLËMBË E SHTRIRË,
QË, KUR BIE PËRDHE
I SHEH NJERËZIT NGA POSHTË
DHE VDES.

HIDHU PËRTEJ

për veten

HIDHU PËRTEJ KËTIJ LUMI ME SHELG,
HIDHU E MOS KI KEQARDHJE PËR GJË;
PËR MATANË NIS NJË TJETËR SHTEG,
PËR KËTEJ TË PASMEN LË.

HIDHE ÇAPIN DHE LAGU KREJTËSISHT,
KY LUM S'TA JEP TË FTOHTIN ASPAK,
PO DHE NE T'A DHËNTTË, BUZËT MOS I PRISH,
TURFULLO E BËJ TUTJE SI UJKU PLAK.

AI SHTEG QË HUMB TUTJE PËRMATANË,
KA QEJF TË SHKELET SI QILIM ARABIE,
HIDHE KËTË LUM QË RRJEDH ME OFSHAMË
E NGA MENDJA PA DROJE TË SHKUARËN FSHIJE.
Për tek kreu

KËRKESË

SA KOT, SA KOT MES MËRZISË
I VETËM TË RRISH PA NJË FJALË
PREJ HESHTJES DHE GOTA DO QË TË KRRISË
QIND COPA TË BËHET DYSHEMESË SË LARË.

TI Ç'BËN, Ç'BËN PSE VETEN NDRYN
DHE PËLLËMBËT I NGJESH PAS KOKËS,
MIRË QË SHPIRTIN KYÇ ME DRYN
POR TË PAKTËN THYEJA KRYET GOTËS.
Për tek kreu

DËSHIRË E PAPLOTËSUAR

BIE SHI DHE MËRZI
NË RRUGË S'DUKET KËMBË NJERIU,
NUK DI PSE S'DAL DHE BRENDA RRI,
SI NË VRIMËZËN E VET MIU.

TË DAL E SHIUN T'A PI,
ME ERËN TË ULËRAS SI ARIU
DHE MUNDET NDONJË PLAKË ME SYTË PLOT HABI,
TË THOTË: "I GJORI, I ZIU."
Për tek kreu

DHIMBJE

KUJTIM I NGRATË MË FAL NJË DRITHMË
MËRZI E MADHE PA TY TE JESH;
NJË RE SI VARKË S'TUNDET NJË GRIMË
QIELLIT QË S'FLET, QIELLIT QË HESHT.

ASGJË S'LËVIZ, AS GJETH MBI DEGË,
DIKU NJË QEN KAFSHON LITARIN E TRASHË ....
UNË EC I VETMUAR E HUMB NË NJË SHTEG
E MË VJEN TË BËRTAS.

AH, KY MËNGJES!

AJO ECËN NË MAJË TE GISHTAVE,
PLOT KUJDES NË UDHËZËN ME BALTË,
AH, KY MËNGJES PA KLITHJEN E GRIFSHAVE
ME FLLAD IA SHPUPURIT FLOKËT E GJATË.

TEK SHTYHET TUTJE TËRË NGUT,
AJO TRUPIN HEPON MBI BALTËN QË HESHT,
AH, KY MËNGJES GËRMUQUR SI MURG,
FJALË PA FUND I PËSHPËRIT NË VESH.

TË VETËDIJSHËM

NE ZGJOHEMI MES SHKUJDESJES SË PËRKRYER
DHE VETËM NAPA E GRISUR E BRYMËS MBI BAR
E MBULON KREJT TË KEQEN TONË.

NE TRUPAT I VESHIM ME LUSPAT GRI TË AGUT,
QË SHTRIHET NGADALË HORIZONTIT, SI NJË BUZËQESHJE E NDROJTUR
NË MBRETËRINË PËRTACE TË NGAZËLLIMIT;

BRUMBULLI

TEK ECJA I QETË MBI TËRFIL
PA DASHUR SHKELA NJË BRUMBULL,
KREJT IU SHTYP TRUPTHI JESHIL,
SI TË ISH NJË KOKËRR KUMBULL.

VETEN MALLKOVA E SHAVA
DHE KËMBËN NË HAPIN FATAL,
ZEMRA M'U LIGSHT E QAVA
PËR BRUMBULLIN E MJERË MBI BAR.

SHPËTOI, MUND TË THOTË DIKUSH,
NGA JETA E ZVARRË PËRDHE;
JO, OR MIK, DHE MJERIMI E MBUSH
SHPIRTIN QË S'NJEH HARE.

DËSHIRË

KJO PEMË E BLERTË ULLIRI
JAM UNË I TËRI ME GJITHË RRËNJË
KRAHËSHQYER, GJOKSENGRËNË,
VEÇ PREJ QIELLIT NË LIRI.

OH, PUSHTOMË O ERË,
KRAHËT ÇIRRI NË KRAHËT E MI,
ME ZË FOSHNJE ULËRIJ,
DEHMA SHPIRTIN SI ME VERË.

E HUMBA
prej Marisës

E HUMBA SI SEDEFIN E RRALLË,
MË AJO NUK VJEN TEK UNË,
GJITHÇKA U RRËNUA ME DHUNË E PËRDHUNË,
SI NË MAGJITË E SHTRIGËS NË PËRRALLË.

TË SHARA I HODHA FATIT TË MBRAPSHTË,
FATIT QË ZEMRËN T'A BËN THËRRIME,
KAM HUMBUR I TËRI THELLË NË MENDIME,
SI GJILPËRA NË KASHTË.

PA ZGJIM

KURRË NDONJËHERË S'KAM RENDUR SI I MARRË,
SI NJË SHKARPË NË RRËKEZËN E HARBUAR;
MË TERHOQI FLLADI PREJ KËMBËSH ZVARRË,
NËPËR FUSHËN ME VESË MBULUAR.

MË BESONI! NUK ISH FUSHË SI FUSHAT E BLERTA,
QË LEHTË PUSHTOHEN PREJ DIELLIT NË AGIM,
POR DY SY FOSHNJË TË VOGLA, TË KTHJELLTA,
KU I TËRI HUMBA NË NJË ËNDËRR PA ZGJIM.