Tiranë, ndërtimorët nisin prishjen e një ndërtese 12-katëshe

Në qendër të Tiranës, Policia Ndërtimore ka nisur prishjen e fasadës të një ndërtese 12-katëshe ende e papërfunduar, pronë e shtetasit Ilir Mata, kunati i deputetit socialist Dashamir Peza. Ai është ndër emrat e parë të përmendur nga kryeministri Berisha, si përfitues i paligjshëm i sipërfaqeve në kryeqytet. Një fadromë e Inspektoriatit nën varësinë e Ministrisë së Punëve Publike, goditi një pjesë të mirë të fasadës në dy katet e para. Aksioni u mbështet nga uniformat blu. Jo zyrtarisht, thuhet se ndërtimorët vepruan për të ndaluar ngritjen e një tuneli, përmes të cilit të kalojnë banorët e lagjes, pas “Hotel Tiranës”. Ndërkaq, ende nuk ka një njoftim zyrtar. Mësohet se shembja e godinës do të vijojë mëngjesin e nesërm.