Zyrtarët serbë pa leje, do të arrestohen

Qeveria e Kosovës ka paralajmëruar që të gjithë ata zyrtarë serbë, të cilët do të hynë në territorin e Kosovës për të marrë pjesë në kurorëzimin e patriarkut Irinej në patriarkanën e Pejës, pa leje nga institucionet e Kosovës, do të arrestohen, njofton Koha Ditore.
Arrestimet për zyrtarët shtetëror serbë të cilët nuk kanë marrë leje dhe të cilët nuk do t’i respektojnë procedurat tjera, i ka paralajmëruar Hajredin Kuqi, që ishte i prerë në deklaratën e tij.
“Vetëm Tadiç ka leje, jo të tjerët dhe ai me kusht që të marrë pjesë dhe të sillet në përputhje me ceremonitë religjioze”, theksoi Kuqi që i pyetur për pjesëmarrjen e mundshme të zyrtarëve tjerë pa leje, tha shkurt se ata do të arrestohen.
Mediumet serbe kanë paralajmëruar pjesëmarrjen edhe të disa politikanëve tjerë të lartë serbë, duke përfshirë këtu edhe kryetarin e Partisë Progresive Serbe, Tomislav Nikoliq dhe ish-kryetari i Parlamentit të Serbisë Predrag Markovic. Në ceremoni pos tjerash ICO ka konfirmuar se do marrë pjesë edhe ish-kryeministri serb, Vojslav Koshtunica.