Holandë, frenohet imigrimi

Qeveria e ardhshme e pakicës në Holandë, me orientim të djathtë, do t'i ashpërsojë kushtet e imigrimit dhe të ndalojë mbulimin e plotë të trupit. Këtë e deklaroi politikani populist i djathtë Gert Wilders, Partia e Lirisë e të cilit ka qëndrim armiqësor ndaj fesë islame dhe do të mbështesë udhëheqjen e re. Masat e vendosura do të përgjysmojnë imigrimin nga vendet joperëndimore, tha ai, duke paraqitur programin së bashku me kryetarin e kristian-demokratëve Maxime Verhagen dhe me Mark Rutte-n, kryetarin e liberalëve të djathtë. Sipas programit qeveria kërkon të vështirësojë tërheqjen e pjesëtarëve të familjes si dhe ardhjen e imigrantëve të pakualifikuar në Holandë. Marrëveshja e koalicionit është ende në rrezik. Disa anëtarë me ndikim të kristian-demokratëve e refuzojnë në mënyrë strikte Gert Wildersin. Nuk dihet se si do të vendosë baza e partisë në kongresin e jashtëzakonshëm të shtunën.