Baleti zhvillohet në Ballkan

Titulli: Baleti zhvillohet në Ballkan 13/11/2007, 17:16

Trupa teatrore nga Anglia, Bullgaria, Rumania, Maqedonia, Serbia e Shqipëria ngjiten në skenën e Butrintit nga 14-21 korrik. Dy Medea, një Elfride Jelinek dhe Shekspir. Tendencat e teatrit në Festivalin e Butrintit, një rast për t’u krahasuar

Jo vetëm shfaqje, por edhe një matje forcash. I njëjti autor, në disa variante, madje edhe e njëjta vepër. Euripid, Shekspir dhe dramaturgë bashkëkohorë janë për këtë vit në programin e festivalit të teatrit “Butrinti 2000”, edicioni VIII. Trupa nga Anglia, Bullgaria, Rumania, Maqedonia, Serbia e Shqipëria, në skenën antike në datat 14-21 korrik. Marrin pjesë 8 trupa teatrore, dy prej të cilave shqiptare. “Butrinti është në një fazë të tillë, kur nuk shqetësohet më për gjeografinë e trupave, por për spektaklin e vërtetë”,- thotë drejtori Alfred Bualioti, i cili tregon se gjatë procesit të seleksionimit, për shkak të nivelit, apo të papërshtatshmërisë me skenën e Butrintit, u është dashur të lënë jashtë trupa teatrore me emër nga St. Petersburgu, Amerika, Italia e Hungaria.

Të gjitha pjesët pjesëmarrëse janë parë paraprakisht nga organizatorët përmes DVD-ve. Këtë vit Shqipëria paraqitet me dy trupa. Është “Atelier 31” që hap festivalin me “Medean” e Euripidit, me regji të Mikel Kalemit dhe Teatri Kombëtar me “Berberin e Seviljes” të Beaumarchais me regji të Eric Vigner-së, që mbyll festivalin. Sipas Bualiotit, këtë herë Shqipëria paraqitet në mënyrë të plotë dhe të dyja veprat përbëjnë spektakle në vetvete. Interesant është fakti që përballë “Medeas” shqiptare do të jetë një “Medea” angleze. “Është një përzgjedhje jo pa qëllim. Është një mundësi për tu ballafaquar dy kultura, dy gjuhë, elementë të aktrimit.

Është një përballje nivelesh të larta”, - pretendon drejtori i Festivalit, sipas të cilit, është hera e parë që në Shqipëri vjen një trupë angleze dhe më konkretisht kompania teatrore “Collisions”. Gjatë ditëve të festivalit shfaqen dy vepra të Shekspirit. Bëhet fjalë për “Natën e 12-të”, që vjen në Butrint nga teatri bullgar “Nikolai Binev” me regji të Krikor Azaryan dhe “Mbreti Simbërlen” i Teatrit Kombëtar gjerman i Timisoarës në Rumani, me regji të Alexander Hausvater.
Mësohet se kjo e fundit është një vepër që nuk është përkthyer ende në shqip dhe vjen në skenë përmes një loje spektakolare dinamike dhe një kostumografie të veçantë. Ndërsa “Nata e 12-të” na kthen në kohën e Shekspirit. Gjithçka serviret si të ishte shek. XVI, madje edhe rolet e grave do të luhen nga burrat, ashtu si në kohën e dramaturgut. Rikthehet edhe këtë edicion Teatri Kombëtar i Greqisë së Veriut, i Selanikut, me një tjetër vepër të Euripidit, “Bakantet” me regji të Tassos Ratzos. Teatri i Dramës së Beogradit shfaq “Një trilogji e vogël e vdekjes” të nobelistes austriake Elfride Jelinek me regji të Nebojsha Bradiç, ndërsa Teatri Maqedonas paraqitet me “Jonadab” të Peter Shaffer, nën regjinë e Dejan Projkovski.

Drejtori i “Butrinti 2000” premton se veprat do të jenë të gjitha të subtitruara, për të ardhur më pranë spektatorit, por edhe për të plotësuar gjithë kriteret e një aktiviteti serioz. Por si çdo vit, pikëpyetja qëndron tek paratë. “Kemi sinjale pozitive nga ana e Ministrisë së Turizmit, Kulturës, Rinisë dhe Sporteve, për mbështetje financiare të festivalit. Pretendojmë të paktën shumën e një viti më parë, 9 milionë lekë të reja, por ende nuk është hedhur firma përfundimtare”, - thotë Bualioti. Ende indiferentë duken edhe përfaqësuesit e pushtetit vendor në Sarandë, të cilët vazhdojnë të ngurojnë për t’iu bërë shpatull të vetmit aktivitet serioz që ka Saranda, si në dimër dhe në verë. Nga ana e organizatorëve është menduar që festivali të zhvillohet në pikun e sezonit turiztik (14 – 21 korrik), për të thithur më shumë spektatorë, dhe për të qenë njëherësh një alternativë më shumë në jetën e zbrazët të turistëve kësaj ane të jugut të Shqipërisë.

» Japoni, zhvillohet festivali i skulpturave me akull