NRG band vëllezër dhe rivalë

Janë larguar nga Tirana me çmimin e grupit më të mirë, “Best grup”. Duket se katër djemtë nga Prishtina e kanë vlerësuar si duhet skenën e festivalit “Kënga magjike” dhe përveç duartrokitjeve të fansave kanë ditur të fitojnë edhe pikët e jurisë. “NRG band” dhe kënga e tyre “Hajde me mu një natë” me disa ritme të theksuara house, (në raport me këngët e mëparshme të grupit) ka qenë e duhura, për një prezantim ndryshe të djemve. Ajo, që vihet re edhe këtë vit, është mënyra e veçantë e performancës së grupit në skenë.E ndërsa vitin e kaluar kishin zgjedhur disa paruke të mëdha dhe kostume me ngjyra të forta, këtë radhë të katër anëtarët e grupit kanë luajtur me veshjet, por edhe me pamjen e veçantë të instrumenteve që kanë paraqitur në skenë. Por cila është lidhja që ekziston mes katër djemve të “NRG band”? Siç mund të kuptohet edhe nga mbiemri, Meti, Besniku dhe Arbeni janë vëllezër. Pavarësisht prirjeve dhe profesioneve të ndryshme, muzika i bashkon, si një pasion i përbashkët. Por kjo është edhe pika, në të cilin tre vëllezërit rivalizojnë dhe ndjehen të tillë. “Ndjehemi edhe rivalë, kur bëhet fjalë për muzikën, shprehen ata. Sepse duke pasur konkurrencë dhe rivalitet, mund të realizojmë dhe të nxjerrim në pah më të mirën”.


Megjithatë duket se meritat dhe vëmendja kryesore, zakonisht në një grup përqendrohen tek solisti. Metit dhe Arbenit, nuk i vjen aspak keq që ky pozicion i përket Besnikut, vëllait të tyre të vogël. “Është më i vogli mes nesh dhe është normale, që vokalisti të marrë më shumë merita”, shprehen ata. Nga ana tjetër, këtë vit më shumë se kurrë, Besniku është përqendruar tek “NRG band”. “Më parë kam pasur bashkëpunime edhe me grupe të tjera për vetë faktin, që dua të shkoj tek publiku në mënyra të ndryshme.

Dhe kanë qenë përvoja të bukura, por këtë vit jam fokusuar më shumë tek “NRG band”, me vëllezërit”, tregon ai. Sa për Xhengisin, mikun e tyre dhe pianistin e grupit? Ai shprehet se është komod, mes tre vëllezërve dhe gjithçka në marrëdhëniet e tyre shkon shumë mirë. Pas përfundimit të festivalit “Kënga magjike”, ku janë vlerësuar edhe me çmim, të katër anëtarët e grupit shprehen se kanë gjetur një atmosferë të ngrohtë dhe një pritje shumë të mirë nga ana e publikut. “Ndjehemi të vlerësuar nga fansat tanë, në të gjitha trojet shqiptare nga fansat tanë”, shprehen djemtë duke shtuar, se kënga me të cilën u prezantuan këtë vit në festival, edhe pse kishte disa ritme house, ishte e pëlqyeshme.

KUSH JANE ANETARET E “NRG BAND”

Emri: Xhengis
Mbiemri: Boshnjaku
Angazhimi: Pianist
i grupit
Profesioni: Student
për Ekonomi

Emri: Meti
Mbiemri: Çaka
Angazhimi: Basist i grupit
Profesioni: Inxhinier në
Korporatën Elektroenergjetike
kosovare

Emri: Arben
Mbiemri: Çaka
Angazhimi: Kitarist i
grupit
Profesioni: Student
për Komunikim Masiv

Emri: Besnik
Mbiemri: Çaka
Angazhimi: Vokalisti
i grupit
Profesioni: Student për
Komunikim Masiv