E bukur por… nuk duhet të jeni patjetër elegante

Ajo që nuk është sinonim vetëm i formave të përkryera dhe trupit për pasarelë. Kënaqësia dhe misteri që fshihet edhe pas një femre, që nuk ha gjithë ditën ushqime vegjetale dhe ka disa kilogramë më shumë. Ato janë me fat, janë në modë, mund të krahasohen me përmasat e një manekini dhe t’i zbrazin pa frikë raftet e dyqaneve, pa njohur sikletin e kopsave që nuk mbërthehen, e pantallonave që me shumë luftë arrijnë të futen deri afër vitheve. Është fjala për femrat e dobëta. Megjithatë, nuk mund të mohohet se edhe ato e shijojnë jetën më shumë. Arsyet?

Sipas një studimi të kryer nga Universiteti i Bristolit në një kampion prej 4000 femrash ka konstatuar se femrat e dobëta jetojnë më shumë se ato të shëndoshat. Duket se këmbët e holla, përveç të qenit simbol i elegancës dhe sharmit, janë edhe fryt i një ushqyerjeje të mirë që në moshë të vogël dhe reduktojnë mundësitë për të pësuar një infarkt në moshë të rritur. Ja edhe kjo duhej për t’i bërë femrat elegante të ndihen në qendër të universit dhe të syrit mashkullor.

Femrat e mbushura duket kanë dalë jashtë loje. Kanë pasur periudhën e shkëlqimit në të shkuarën, por tani... diçka po ndryshon. Së fundmi, një topolake (60 kile për 1.64 gjatësi, me përmasa 90-75-110) simpatike, pesëmbëdhjetëvjeçare ruse, Aliona Pisklova, falë një shakaje të një miku të saj, rrezikoi të merrte pjesë në finalen e “Miss Universit”, pa qenë fare në dijeni. Ja që çudia ndodhi.

Në Rusi, në seleksionimet online për konkursin, Aliona ishte më e votuara prej konkurrenteve. Të dobëtat, me disa përjashtime të vogla, nuk hanë kurrë, nuk i shijojnë kënaqësitë e shijes. Divat e momentit, për të qenë mishërim i vërtetë i modës, vdesin nga uria, edhe pse shtiren si të lumtura: Guinet Paltrou thotë se ushqimi i saj i preferuar është orizi, Liz Harley nuk jeton pa gjashtë gota lëng lakre në ditë, kurse Demi Moore ha vetëm ushqime të papjekura dhe vegjetale. Cilado që të jetë arsyeja që i shtyn, t’i shohësh duke ngrënë do të ishte vërtet e trishtueshme: një sallatë, një frutë, ujë natyral, asnjë pikë verë dhe para një ëmbëlsire fytyra e tyre do të shtrembërohej me pamje të terrorizuar neverie.

Por, duket se edhe publiciteti po ndryshon drejtim: një shoqëri e njohur, prodhuese sapunësh dhe produktesh kozmetike, pasi zbuloi nëpërmjet një sondazhi, që ndoshta meshkujt preferojnë femrat me linja më të mbushura, vendosi të përdorë si imazh për fushatën e saj të fundit publicitare, që kushtoi më shumë se 4 milionë euro, femra të vërteta, pa asnjë eksperiencë në fushën e modës.

Duke marrë duartrokitje edhe nga publiku femëror, kjo shoqëri tregoi se bukuria më shumë sesa elegancë është sharm, tërheqje, inteligjencë dhe aftësi. Femrat e mbushura, ato që kanë vendosur ta shijojnë ekzistencën e tyre në këtë botë, janë simpatike, kanë humor dhe i buzëqeshin vetes dhe jetës.